Otyrys qasiretti oqıǵa kezinde qaza tapqandardy bir mınýt únsiz eske alýmen bastaldy.
«Prezıdentimiz Qasym-Jomart Kemeluly Toqaev aıtqandaı, «táýelsizdik tarıhynda biz alǵash ret asa kúrdeli jáne qaterli kezeńge tap boldyq». Elimiz osy kúnderi aýyr synaqty bastan ótkerdi. Syn saǵatta Memleket basshysynyń batyl sheshimder qabyldaýynyń jáne halqymyzdyń danalyǵy men sabyrlyǵynyń arqasynda qasiretti qańtar oqıǵalarynan óttik.
Elimizdiń egemendigi men táýelsizdigin saqtap qaldyq. Qımas jandarynan aırylǵan barsha otandastardyń qaıǵysyna taǵy da ortaqtasyp, kóńil aıtamyn. Jaraqat alǵan, soqqy kórgen azamattardyń tezirek saýyǵyp ketýine tilektespin.
Eń bastysy, eldiń tynyshtyǵy, adamdardyń amandyǵy ekenine taǵy da kózimiz jetti. Qıraǵan dúnıe túzeler, órtengen ǵımarattar qalpyna keler, biraq júregimizge túsken syzat eshqashan óshpeıdi», – dedi Baýyrjan Baıbek.
Onyń aıtýynsha, «Nur Otan» Memleket basshysy qoıǵan áleýmettik-ekonomıkalyq saladaǵy naqty mindetterdi oryndaýǵa óziniń búkil resýrstaryn iske qosqan.
Partıanyń Májilistegi fraksıasy Prezıdent atap ótken máselelerdi oryndaýdyń zańnamalyq negizin qamtamasyz etý isine kirisip ketken. Máslıhattardaǵy depýtattar jer-jerde halyqpen tikeleı kezdesip, túsindirý jumystaryna belsene atsalysyp, sondaı-aq qıratylǵan ınfraqurylymdardy qalpyna keltirýge úles qosýda.
Bul rette partıanyń qoǵamdyq qabyldaýlary osy kúnderi turaqty jumys istedi. Partıanyń birneshe myń belsendisi «Halyq saqshysy» qoǵamdyq drýjınalar sapynda Almaty qalasynda qoǵamdyq tártip ornatýǵa atsalysyp, áskerılerge, polısıa jáne komýnaldyq sala qyzmetkerlerine kómektesti.
Sonymen qatar, partıa eriktileri tek Almaty qalasynyń ózinde 155 mln teńgeden astam somaǵa ártúrli kómek kórsetti.
«Qazirgi tańda partıanyń barlyq múmkindigi men kúsh-jigerin Prezıdent Qasym-Jomart Kemeluly Toqaev alǵa qoıǵan maqsat-mindetterdiń sapaly oryndalýyna jumyldyrýymyz kerek.
Partıanyń qolynda qajetti tetiktiń bári bar. Biz byltyr el aýmaǵynda barlyq deńgeılerde qurylǵan 1 myń 700-den asa qoǵamdyq keńes jumysyn jolǵa qoıdyq. Onyń quramynda 12 myńnan asa adam bar, úshten biri – qoǵam belsendileri, úkimettik emes uıym músheleri, kásipkerler, aqparat quraldarynyń ókilderi men blogerler.
Byltyr olar nátıjeli qyzmet jasap, kóptegen keleli usynystar berdi, birqatar kókeıkesti problemalardyń sheshilýine muryndyq boldy. Qajetti tájirıbe men múmkindikter bar. Sondyqtan, «Nur Otan»-nyń qoǵamdyq keńesteri Prezıdent bastamalaryn qoldap, berilgen tapsyrmalardyń jergilikti jerlerde tolyqqandy oryndalýyna kómektesýi kerek», – dep atap ótti ol.
Partıa Tóraǵasynyń Birinshi orynbasary atap ótkendeı, aqpan aıynda «Nur Otan» depýtattarynyń qoǵamdyq reıtıńin qalyptastyrýǵa arnalǵan platforma jarıa formatta iske qosylady.
«Qoǵamdyq reıtıń máslıhat depýtattaryn halyqpen etene aralasyp, saılaýshylarmen turaqty túrde baılanys ornatýǵa yntalandyrý úshin jasalǵan bolatyn.
Osy oqıǵalar bul bastamanyń qanshalyqty ózekti ári mańyzdy ekenin kórsetti. Halyq qalaýlylary – eń aldymen halyqpen qoıan-qoltyq jumys isteýi tıis. Ashyq túrde, elmen etene jumys isteıtin, qoǵamdyq jaýapkershilikti moınymen kótere alatyn bilikti depýtattarymyz ben rezervtegi belsendi partıalastarymyz halyq talabyna saı laıyqty baǵasyn alýy tıis.
Byltyr qyrkúıek aıynan bastap bul mehanızm barlyq óńirlerde synaqtan ótti. Aqpan aıynan bastap biz qoǵamdyq reıtıń nátıjesin turaqty túrde jarıalap otyratyn bolamyz», – dep málimdedi Baýyrjan Baıbek.
Kezdesý barysynda partıa Tóraǵasynyń Birinshi orynbasary Tuńǵysh Prezıdenttiń el tarıhyndaǵy róline arnaıy toqtalyp, áleýmettik jelilerde partıa atyna aıtylyp jatqan syndarǵa da jaýap berdi.
«Prezıdent Qasym-Jomart Kemeluly «Kúshimiz – birlikte!» dep barlyǵymyzdy ortaq maqsat jolynda toptasýǵa shaqyryp otyr. Qazaq «jumyla kótergen júk jeńil» deıdi. «Nur Otan» partıasy eldiń birligi men ishki turaqtylyqty saqtaýdyń mańyzyn únemi aıtyp keledi. Partıa tý etken osy máselelerdiń qanshalyqty mańyzdy ekenin ómirdiń ózi kórsetip otyr.
Osyndaı qıyn-qystaý kezde partıa jumysynan min izdep, «Parlament taratylsyn, partıa taratylsyn» degen maǵynada áńgime taratyp júrgender bar. Muny aıtýshylar – «Nur Otan» partıasy memlekettiliktiń, eldiktiń negizgi qoǵamdyq-saıası tireginiń biri ekenin múldem túsinbeıtinder.
«Nur Otan» partıasy qurylǵaly beri Qazaqstan memlekettiligin saqtaý úshin, qoǵam birligin bekem etý úshin jumys istep keledi. «Uly ister úndemeı bitedi» demekshi, bul – dańǵoılyqqa salýǵa bolmaıtyn, kózge kórinbeıtin ister. Sondyqtan biz aıtylǵan qısyndy syndy kótere bilip, al, júıesiz sózge mán bermeı, bel sheship jumys istegenimiz jón», – dep atap ótti ol.
Onyń aıtýynsha, qazir Tuńǵysh Prezıdentimiz týraly da nebir pikir aıtýshylar kóbeıgen. Tarıh bezbenine salsaq, kez kelgen oqıǵanyń, ne tulǵanyń ótkendegi róline biryńǵaı oń ne bolmasa tek qana teris dep baǵa berýge bolmaıdy.
Mysaly, Túrkıanyń tuńǵysh prezıdenti Mustafa Kemal Atatúrik týraly da qarama-qaıshy pikirler kóp. Biraq, ol zamanaýı túrik memleketiniń negizin qalaýshy tarıhı tulǵa bolyp qala bermek.
«Ótkenge baǵa berý árkimniń qolynan keledi, biraq aqıqat pen jalǵandy ajyratý árkimniń óz ar-uıatyna baılanysty. Eń qıyn kezeńde, ıaǵnı biz memleket bolamyz ba, bolmaımyz ba degen sonaý almaǵaıyp 90-shy jyldary Nursultan Ábishuly Nazarbaevtyń basshylyǵymen Qazaqstan Táýelsiz memleket bolyp qalyptasty, etek-jeńin jıdy. Tóńiregimen terezesi teńesti. Jalpy álemdik qaýymdastyq moıyndady.
Elbasy men sol kezdegi aǵa urpaqtyń 30 jyl boıy memlekettiliktiń irgesin bekitip, shekarasyn shegendep, terıtorıasynyń tutastyǵyn saqtaýǵa sińirgen eren eńbegi ult tarıhynda óziniń oń baǵasyn alary sózsiz. Al, osy jyldary keteýi ketken dúnıeni tezirek túzeýimiz kerek. Ol – sózsiz. Prezıdent jarıalaǵan reformalardyń da máni osy.
Biraq, Memleket basshylyǵynan ketken Nursultan Nazarbaevty jata jamandaý – eldigimizge, azamattyǵymyzǵa syn», – dedi ol.
Baýyrjan Baıbek atap ótkendeı, 30 jylǵa endi tolǵan Táýelsizdigimizdi baıandy etý úshin qazaqstandyq qoǵamda memlekettiliktiń dástúrin, onyń ishinde bılik sabaqtastyǵynyń dástúrin qalyptastyra bilýimiz shart.
«Biz úshin qazir eldigimizdi saqtaý, bardy uqsatý asa mańyzdy. Sondyqtan Elbasy qurǵan «Nur Otan» partıasy eldiń birligi men qoǵamnyń turaqtylyǵyna baǵyttalǵan jumysyn odan ári jalǵastyrýy kerek. Qazirgi tańda biz alda bolatyn kezekten tys Sıez jumysyna daıyndyqty bastap kettik. Qańtardyń qasiretti kúnderinde Elbasy barshamyzdy Prezıdenttiń mańaıyna toptasyp, eldiń amandyǵy men birligin saqtap qalý úshin birge áreket etýge úndegenin barshańyz bilesizder.
Kim ne dese de, «Nur Otan» partıasy – Prezıdent jarıalaǵan reformalardy tolyq jáne sapaly júzege asyrýǵa áleýeti tolyq jetetin birden-bir qoǵamdyq-saıası kúsh.
Partıamyz Memleket basshysy alǵa qoıǵan mindetterdi oryndaý úshin bar kúsh-jigerin – qoǵamdyq uıymdardy, depýtattyq fraksıalardy, túrli qyzmette júrgen 800 myńǵa tarta barlyq múshesin ortaq maqsatqa jumyldyrýǵa daıyn», – dep túıindedi ol.
Otyrys barysynda Almaty qalasy, Mańǵystaý, Jambyl oblystyq fılıaldary tóraǵalarynyń birinshi orynbasarlary, sonymen qatar «Jas Otan» jastar qanatynyń tóraǵasy qazirgi tańda partıa tarapynan jergilikti ákimdikterge ınfraqurylymdardy qalpyna keltirý, qoǵamdyq tártipti nyǵaıtý, volonterlar qyzmetin úılestirý jáne basqa da atqarylyp jatqan jumystar boıynsha aqparat berdi.
https://www.youtube.com/watch?v=ZWzPjX4d5tc
