Jaǵdai bulai jalǵasa berse óńirde asha tuiaq mal qalmaidy dep dabyl qaǵyp otyr sharýalar. Al ákimniń ornyna mal ieleriniń shaǵymyn tyńdaǵan aýyl sharýashylyǵy basqarmasynyń jańa basshysy úkimetten kómek berilip jatyr dep miz baqqan joq.
Bul jaiynda Dalanews.kz 31 arna "Informbiýro" jańalyqtar bólimine silteme jasap habarlaidy.
Qýańshylyqtan ábden qysylǵan sharýalar búgin ákimi Nurlan Noǵaevty ákimdikke ózderi izdep kelgen. Biraq qoradaǵy malyna azyq tappai qinalǵan bir top azamat bar sharýasyn ysyryp kelgende, Noǵaev myrza kabinetinde bolmai shyǵady. Degenmen sharýalardy aýylsharýashylyǵy basqarmasynyń basshysy tyńdady.
"Men aittym eń bolmasa qazirgi qunyn 50-60 paiyzǵa arzandatyńdarshy dedim jem men shóptiń qunyn. Sen maldy men úshin baǵyp júrgen joqsyń dep alyp, bylai deidi. Aýǵanstanǵa 58 myń tonna bidai jiberip jatyrmyz degendi alǵa tartady. Men aitamyn "Aýǵan qazaq úshin soǵysyp jatyr ma?" - dep. Sonda Aýǵanstanǵa sondai kómek jasap jatqanda myna ózimizdiń qara halyq qazaqtyń balasyna nege kómek jasamasqa?", - deidi sharýa Ádilbek Saǵyndyq.
Mal baqqan azamattar Mańǵystaý oblysynda tótenshe jaǵdai jariialaý týraly usynys bildirgisi kelgen. Tótenshe jaǵdai jariialanyp, memleketten kómek berilse, óńirdegi qalǵan mal basyn aman alyp qalýǵa bolady deidi olar. Sonymen qatar qudyq qazý, jaiylym jáne shabyndyq jerlerdi durys igerýge kóńil bólinse degen de tilekteri bar.
Odan bólek, Mańǵystaýdyń jaby jylqysyn jáne túiesin asyl tuqymdy mal qataryna engizip, zańnamalarda kórsetilgen túrli kómekter berilsin dep otyr.
“Mal azyǵy da sharýa qojalyqtarynda tapshy ekenin kórip otyrmyz. Mal azyǵy nashar bolǵandyqtan maldyń da kúii, qundylyǵy óte tómen. Biraq oǵan qaramastan úkimet tarapynan kómek kórsetilip jatyr. Tap qazir ákim kele alady dep aita almaimyn. Ákimniń de josparlanǵan sharalary bar", - deidi Mańǵystaý oblysy aýyl sharýashylyq basqarmasynyń basshysy Qazbek Máshimov.
Qazbek Táshimov jýyrda ǵana oblystyń aýylsharýashylyǵy basqarmasyna basshy bolyp taǵaiyndalǵan. Onyń aitýynsha, qazirgi ýaqytta qysqy mal azyǵy úshin 68 myń tonna shóp, 30 myń tonnadan astam jem qory daiyn tur.
https://youtu.be/cWVx9AyJfdQ
