جاعداي بۇلاي جالعاسا بەرسە وڭىردە اشا تۇياق مال قالمايدى دەپ دابىل قاعىپ وتىر شارۋالار. ال اكىمنىڭ ورنىنا مال يەلەرىنىڭ شاعىمىن تىڭداعان اۋىل شارۋاشىلىعى باسقارماسىنىڭ جاڭا باسشىسى ۇكىمەتتەن كومەك بەرىلىپ جاتىر دەپ ءمىز باققان جوق.
بۇل جايىندا Dalanews.kz 31 ارنا "ينفورمبيۋرو" جاڭالىقتار بولىمىنە سىلتەمە جاساپ حابارلايدى.
قۋاڭشىلىقتان ابدەن قىسىلعان شارۋالار بۇگىن اكىمى نۇرلان نوعايەۆتى اكىمدىككە وزدەرى ىزدەپ كەلگەن. ءبىراق قوراداعى مالىنا ازىق تاپپاي قينالعان ءبىر توپ ازامات بار شارۋاسىن ىسىرىپ كەلگەندە، نوعايەۆ مىرزا كابينەتىندە بولماي شىعادى. دەگەنمەن شارۋالاردى اۋىلشارۋاشىلىعى باسقارماسىنىڭ باسشىسى تىڭدادى.
"مەن ايتتىم ەڭ بولماسا قازىرگى قۇنىن 50-60 پايىزعا ارزانداتىڭدارشى دەدىم جەم مەن ءشوپتىڭ قۇنىن. سەن مالدى مەن ءۇشىن باعىپ جۇرگەن جوقسىڭ دەپ الىپ، بىلاي دەيدى. اۋعانستانعا 58 مىڭ توننا بيداي جىبەرىپ جاتىرمىز دەگەندى العا تارتادى. مەن ايتامىن "اۋعان قازاق ءۇشىن سوعىسىپ جاتىر ما؟" - دەپ. سوندا اۋعانستانعا سونداي كومەك جاساپ جاتقاندا مىنا ءوزىمىزدىڭ قارا حالىق قازاقتىڭ بالاسىنا نەگە كومەك جاساماسقا؟"، - دەيدى شارۋا ادىلبەك ساعىندىق.
مال باققان ازاماتتار ماڭعىستاۋ وبلىسىندا توتەنشە جاعداي جاريالاۋ تۋرالى ۇسىنىس بىلدىرگىسى كەلگەن. توتەنشە جاعداي جاريالانىپ، مەملەكەتتەن كومەك بەرىلسە، وڭىردەگى قالعان مال باسىن امان الىپ قالۋعا بولادى دەيدى ولار. سونىمەن قاتار قۇدىق قازۋ، جايىلىم جانە شابىندىق جەرلەردى دۇرىس يگەرۋگە كوڭىل بولىنسە دەگەن دە تىلەكتەرى بار.
ودان بولەك، ماڭعىستاۋدىڭ جابى جىلقىسىن جانە تۇيەسىن اسىل تۇقىمدى مال قاتارىنا ەنگىزىپ، زاڭنامالاردا كورسەتىلگەن ءتۇرلى كومەكتەر بەرىلسىن دەپ وتىر.
“مال ازىعى دا شارۋا قوجالىقتارىندا تاپشى ەكەنىن كورىپ وتىرمىز. مال ازىعى ناشار بولعاندىقتان مالدىڭ دا كۇيى، قۇندىلىعى وتە تومەن. ءبىراق وعان قاراماستان ۇكىمەت تاراپىنان كومەك كورسەتىلىپ جاتىر. تاپ ءقازىر اكىم كەلە الادى دەپ ايتا المايمىن. اكىمنىڭ دە جوسپارلانعان شارالارى بار"، - دەيدى ماڭعىستاۋ وبلىسى اۋىل شارۋاشىلىق باسقارماسىنىڭ باسشىسى قازبەك ءماشىموۆ.
قازبەك ءتاشىموۆ جۋىردا عانا وبلىستىڭ اۋىلشارۋاشىلىعى باسقارماسىنا باسشى بولىپ تاعايىندالعان. ونىڭ ايتۋىنشا، قازىرگى ۋاقىتتا قىسقى مال ازىعى ءۇشىن 68 مىڭ توننا ءشوپ، 30 مىڭ توننادان استام جەم قورى دايىن تۇر.
https://youtu.be/cWVx9AyJfdQ
