2025 jyldyń kúzinen bastap Qazaqstanda kepilsiz tutynýshylyq nesie rásimdeý erejeleri kúrdeli ózgeriske ushyraidy. Jańashyldyqtar azamattardyń qarjylyq qaýipsizdigin qamtamasyz etý jáne alaiaqtyqtan qorǵaý maqsatynda engizilip otyr. Bul týraly Qarjy naryǵyn retteý jáne damytý agenttigi habarlady, dep habarlaidy Dalanews.kz.
- Nesie alý úshin bankke jeke barý kerek
Endi alǵash ret kepilsiz tutynýshylyq nesie alatyn azamattar mindetti túrde bank nemese mikroqarjy uiymynyń keńsesine kelýi tiis. Bul talap adamnyń jeke basyn tikelei, kózbe-kóz tekserý úshin engizildi.
- Onlain nesie rásimdeýge jas shekteýi qoiyldy
Jasy 21-ge jetpegen jáne 55-ten asqan azamattarǵa onlain nesie tek olardyń arnaiy kelisimimen beriledi. Bul kelisimdi azamat eGov.kz portaly, bank qosymshasy nemese ózge memlekettik elektrondy júieler arqyly rastaidy. Mundai qadam arqyly nesie óz erkimen alynyp jatqany dáleldenýi qajet.
- «Salqyndatý kezeńi»: asyǵys nesiege jol berilmeidi
Jańa erejege sáikes, nesie týraly kelisimshartqa qol qoiylǵannan keiin, qarajat birden berilmeidi. Klientke belgili ýaqyt aralyǵynda oilanýǵa múmkindik beretin «salqyndatý kezeńi» engiziledi. Osy merzim aiaqtalǵan soń, klient nesieni alýǵa nietti ekenin qaita rastasa ǵana qarajat aýdarylady. Bul ereje zań resmi jariialanǵan soń, 90 kúnnen keiin kúshine enedi.
- Alaiaqtar rásimdegen nesie sotsyz keshirilýi múmkin
Endi alaiaqtar zańsyz rásimdegen nesielerdi belgili sharttarmen sotqa júginbei-aq esepten shyǵarýǵa bolady. Mundai jaǵdai eki shart oryndalǵanda múmkin:
- Azamattyń jábirlenýshi ekendigi quqyq qorǵaý organdary tarapynan resmi rastalsa;
Nesie berýshi uiym klientti biometriialyq sáikestendirýden ótkizbese nemese onyń kelisimin tiisti jolmen almaǵan bolsa.
Al alaiaqtyq áreket kúrdeli bolyp, úshinshi tulǵa azamattyń jeke derekterin zańsyz qoldanǵan jaǵdaida nesie tek sot sheshimimen ǵana joiylady.
- Bankterdiń qosymsha quqyǵy artady
Bank nemese mikroqarjy uiymdary klienttiń shotyndaǵy qarjy operatsiialaryn kúdikti jaǵdailarda 5 jumys kúnine deiin ýaqytsha toqtatýǵa quqyly bolady. Sonymen birge, klienttiń ózi nemese onyń seriktesi Antifrod-ortalyqtyń «qara tizimine» engen jaǵdaida bank bul azamattarmen qandai da bir operatsiia jasaýdan bas tarta alady.
