Óńirlerde tasqyn sýdyń beti áli de qaitpai tur. Halyq úilerin tastap, mektepter men áleýmettik nysandardy panalap jatyr. Halyqtyń uzaq jyl jinaǵan mal-múlkine iri kólemde zalal keldi, oǵan qosa tótenshe jaǵdai kezinde baǵytyn joǵaltyp alǵandar da bar.
Májilis depýtaty Maqsat Tolyqbai bul jaǵdaidan keiin Úkimette aýys-túiis jasaý kerek ekenin aitty, - dep habarlaidy Dalanews.kz.
Depýtattyń sózinshe, ákimdikterde eshqandai daiyndyq joq. Bul - Úkimet pen ákimdikter arasynda bailanys joq ekeniniń belgisi. Maqsat Tolyqbai bul jaǵdaiǵa kináli retinde Roman Skliardy atady.
"Tamyrynan qurttaǵan aǵash butaǵynan emdelmeidi. Roman Skliardan bastap Úkimettiń keibir múshelerin aýystyratyn kez keldi.
Aimaqtardy aralap, Aqtóbeniń ortasyna shettik. Biraq, qadirli aǵaiyn, shynyn aitý kerek, ákimdikterdiń daiyndyǵy óte nashar. Tipti basqasyn aitpaǵanda, keibir aýdan ákimderiniń rezervinde ne qaiyq joq, sý etik tabylmai jatyr. Ákimdik pen Úkimettiń arasynda bailanys joqtyń qasy desek bolady.
Buǵan birinshi kezekte kim jaýapty? Ashyǵyn aitý kerek, premer-ministrdiń orynbasary Roman Skliar jaýapty. Keshe Aqtóbege keldi. Alǵa deitin bir aýdanǵa bardy, biraq sýdyń astynda qalǵan Oiylǵa nege barmaidy?
Munyń aldynda alapat órt bolǵanyn bilesizder. Qanshama adam órtenip ketti. Buǵan da kim jaýapty? Roman Skliar jaýapty. Sógispen qutyldy.
Sondyqtan bul ózgelerge sabaq bolýy úshin Prezident sógis jariialap jatyr. Biraq Roman Skliardan bastap Úkimettiń keibir múshelerine shara qoldanyp, aýystyratyn kez keldi ǵoi dep oilaimyn", - dedi depýtat.
Aita keteiik, Prezident Qasym-Jomart Toqaev eldegi jaǵdaidan keiin shuǵyl jiyn ótkizip, Qanat Bozymbaevty premer-ministrdiń orynbasary laýazymyna taǵaiyndady.
Endi Bozymbaev tótenshe jaǵdailar boiynsha jetekshilik etedi.
"Memleket basshysynyń jarlyǵymen Qazaqstan Respýblikasy premer-ministriniń orynbasary bolyp taǵaiyndalǵan Qanat Aldabergenuly Bozymbaev óńirlik saiasat, turǵyn úi-kommýnaldyq sharýashylyq, tótenshe jaǵdailar jáne sý resýrstary máselelerine jetekshilik etetin bolady", - dep jazdy Berik Ýáli.
