Marqum Bolat Nazarbaevtyń burynǵy áieli Maira Qurmanǵalievanyń uly Daniiar Kesikbaevqa qatysty jańa aqparat jariialandy. New York Post basylymynyń dereginshe, ol AQSh-tyń Niý-Djersi shtatyndaǵy eń qymbat úilerdiń birin nebári 10 dollarǵa satyp alǵan, dep habarlaidy dalanews.kz.
Áńgime Alpain aýdanyndaǵy záýlim úi týraly bolyp otyr. Basylym málimetinshe, bul úi bir kezderi 34 million dollarǵa satylymǵa qoiylǵan. 2012 jyly ony anonim kompaniia 20 million dollarǵa satyp alǵan. New York Post derekkózderi bul kompaniiany Daniiar Kesikbaevpen bailanystyrǵan. Qazir múliktiń salyqtyq quny 35,5 million dollarǵa baǵalanady.
Záýlim úidiń aýmaǵy shamamen 1,6 myń sharshy metr. Onda 9 jatyn bólme, basketbol alańy, boýling, úi kinoteatry, kitaphana, sharap qoimasy, lift jáne bassein bar. Al jer teliminiń kólemi 3 gektardan asady.
Daniiar Kesikbaev – Malaiziianyń burynǵy premer-ministri Nadjib Razaktyń kúieý balasy. Nadjib Razak 1MDB memlekettik qoryna qatysty atyshýly is boiynsha sottalyp, qazir túrmede jazasyn ótep jatyr. Tergeý barysynda onyń jeke shottarynan shamamen 700 million dollar tabylǵany aitylǵan. 2020 jyly sot ony jemqorlyq jáne aqshany jylystatý baptary boiynsha kináli dep tanyǵan.
Basylym buǵan deiin Kesikbaevtyń The Plaza Hotel qonaqúiindegi quny 20 million dollar bolatyn páterdi nebári 1 dollarǵa alǵanyn da jazǵan.
Aita keteiik, 2012 jyly Bolat Nazarbaev burynǵy áieli Maira Qurmanǵalieva men ógei uly Daniiar Kesikbaevty 100 million dollardan astam aktivti shetelge shyǵardy dep aiyptap, sotqa júgingen. Keiin taraptar bul daýdy sottan tys rettegen.
