Eks-prezident Nursultan Nazarbaevtyń burynǵy saiasi serikterimen keiin týystyq bailanystar arqyly da jaqyndasqany týraly jýrnalist Asylhan Mamashulynyń "Jon arqadan urylǵan pyshaq. Qily kezeń" atty derekti filminde aityldy, dep habarlaidy dalanews.kz.
Filmde 1980 jyldardaǵy Qazaq KSR biligi, Dinmuhamed Qonaev pen Nursultan Nazarbaev arasyndaǵy saiasi sabaqtastyq, sondai-aq keiin táýelsiz Qazaqstan kezeńinde yqpaldy toptardyń qalyptasýy sóz bolady.
Avtordyń aitýynsha, Dinmuhamed Qonaevtyń qoldaýymen Nursultan Nazarbaev 1984 jyly Qazaq KSR Ministrler keńesiniń tóraǵasy qyzmetine taǵaiyndalǵan. Bul qyzmet onyń uzaq jyldarǵa sozylǵan saiasi jolyndaǵy mańyzdy kezeńderdiń biri retinde sipattalady.
Sol ýaqytta Nazarbaev basqarǵan Ministrler keńesiniń quramynda Muhtar Áliev densaýlyq saqtaý ministri qyzmetin atqardy. Qanat Saýdabaev Qazaq KSR Kinematografiia jónindegi memlekettik komitetin basqardy. Al Asqar Qulybaev Joǵarǵy sovet prezidiýmynyń múshesi bolǵan.
Derekti filmde osy tulǵalardyń keibiri keiin Nazarbaev áýletimen qudandaly bolyp, táýelsizdik jyldarynda da yqpaldy ortada qalǵany aitylady. Atap aitqanda, Muhtar Álievtiń uly Rahat Áliev Dariǵa Nazarbaevaǵa úilengen. Al Asqar Qulybaevtyń uly Timýr Qulybaev Dinara Nazarbaevamen shańyraq kótergen.
Qanat Saýdabaev ta táýelsiz Qazaqstanda joǵary memlekettik qyzmetter atqardy. Ol 1994 jyly syrtqy ister ministri bolyp taǵaiyndalyp, keiin Qazaqstannyń Túrkiiadaǵy jáne Ulybritaniiadaǵy elshisi boldy. 1999 jyly elge oralyp, premer-ministrdiń keńesshisi, keiin memlekettik hatshy qyzmetin atqardy.
"Jon arqadan urylǵan pyshaq" filminde 1985-1995 jyldar aralyǵyndaǵy Qazaqstandaǵy saiasi oqiǵalar, Qonaev pen Nazarbaev arasyndaǵy qarym-qatynas jáne bilik ishindegi ózgerister keńinen taldanady.
