Nazarbaevtyń santehnik inisi qaida júr?
«Vedomstvoaralyq tergeý toby (UQQ, Antikor, QMA) Bolat Nazarbaevtyń memleketten keń kólemde aqsha jymqyrý faktilerin jáne eń bastysy – «Qańtar oqiǵasyn» uiymdastyrýǵa qatysy bar-joǵyn tergeýde. Bul týraly organdarǵa jaqyn «DALA insaid» derekkózi habarlady. Onyń aitýynsha, Qairat Satybaldyny tergeý protsessiniń ekonomikalyq kezeńi aiaqtalýǵa jaqyn jáne qazirgi fokýs «Qańtar oqiǵasyn» uiymdastyrý barysyna aýysty. Tergeý osy isterge Bolat Nazarbaevtyń qatysy bar ma, sony bilgisi keledi», - dep jazdy telegram arnasy.
Alaida resmi BAQ-ta bul týraly aitylǵan joq.
Bolat Nazarbaevtyń «qańtar oqiǵasynan» keiin Qyrǵyzstan arqyly BAÁ-ne ushyp ketkeni týraly jańalyq taraǵan. Qyrǵyzstannyń «24.kg» jańalyqtar saityna 12 qańtarda shyqqan aqparatqa sáikes, eks-prezidenttiń inisi kórshi eldiń shekarasyna jeke kóligimen kirgen.
«Áleýmettik jelilerde Nursultan Nazarbaevtyń inisi Bolat qyrǵyz-qazaq shekarasyn kesip ótkeni týraly qujat tarap jatyr. Qujatta Bolat Nazarbaev 2022 jylǵy 6 qańtar, saǵat 5:36-da Qyrǵyzstan aýmaǵyna avtokólikpen kirgeni kórsetiledi. 24.kg-niń senimdi derekkózderiniń habarlaýynsha, Nursultan Nazarbaevtyń inisi shekarany «Aq Jol-avtojol» (Qyrǵyzstan) - «Qordai — avtojol» (Qazaqstan) BÓP arqyly kesip ótkeni belgili boldy.»Bolat Nazarbaev Qyrǵyzstan aýmaǵyna 6 qańtarda kirdi. Ol sol kúni «Manas» áýejaiynan Bishkek-Dýbai baǵyty boiynsha ushyp ketti», - dep habarlady redaktsiia.
6 qańtar kúni Qyrǵyzstannyń «Manas» áýejaiyna Nazarbaevtardyń jekemenshik ushaǵy sanalatyn Bombardier Global Express ushaǵy Abý-Dabiden kelip qonǵan. Sol túni Bolat Nazarbaev ushyp ketedi. Manas áýejaiynyń baspasóz hatshysy Áliia Qurbanova ushaq ishinde kimniń bolǵanyn habarlamasa da, 6 qańtarda Dýbaidan Bishkekke jeke ushaq ushqanyn rastaǵan.
Osy habardan keiin Bolat Nazarbaevtyń Qazaqstanǵa oralǵany týraly aqparat shyqpaǵan. Sońǵy ýaqytta BAQ betine Bolat Nazarbaevtyń «qysymyna ushyraǵan» azamattar shyndyǵyn aityp shyǵyp jatyr.
Almaty oblysyndaǵy «Almaty Steklo» záýlim zaýytynyń teń quryltaishysy jáne bas direktory Ázim Abdýllaev óndiris ornynan túsetin paidanyń 50 paiyzyn eks-prezidenttiń inisi Bolat Nazarbaev tartyp alyp otyrǵanyn aitqan. Ázim Abdýllaevtyń aitýynsha, 2016 jyly zaýyt ashylǵannan beri ai saiyn Bolat Nazarbaevqa 250-300 myń dollor tólep otyrǵan. Kásipker bir ǵana zaýyt emes, Qarasai aýdanynda ornalasqan «Bahar» meiramhanasynyń, «liker-ishimdik shyǵaratyn Shalqar -17» zaýytynyń túsimine Nursultan Nazarbavtyń inisi ortaqtasqanyn aitqan.
«Onymen birge jumys istegen 15 jyldyń ishinde 60 million dollor berdim», - deidi Abdýllaev.
Sonymen qatar byltyrdan beri qamaýda otyrǵan «Parmigiano Group» meiramhanalar jelisiniń negizin qalaýshy jáne Almatydaǵy «Esentai City» jobasynyń avtory Almas Ábdiǵapparov jáne onyń týystary buǵan deiin «Bolat Nazarbaevtyń adamdary» olardyń otbasynyń biznesin iemdengenin málimdegen bolatyn.
Sáýirdiń birinde Bolat Nazarbaev «túrmege japqan azamat» týraly «acca.media» saityna maqala jaryq kórdi. Maqalada bylai delingen:
«Beriktas aýylynda at jarysy bolady. Jarysta Esbol Japbasovtyń júirik tulparlary birinshi bolyp kelip, ol eki kólik utyp alady. Onyń Samal atty júirigine Bolat Nazarbaevtyń kózi birden túsedi. Nazarbaev sol kezdegi Talǵar aýdanynyń ákimi (2020 jyly shilde aiynda qaitys bolǵan) Jolan Omarov arqyly Japbasovtyń tulparyn ózine berýin suratady. Burynǵy ákim Esbolǵa «bolashaqta qiyndyqqa tap bolmaý úshin tulpardy Nazarbaevqa bergeni durys ekenin» aitady. Alaida Esbol bul usynystan bas tartady. Sol úshin Esbol Japbasovqa kontrabandamen ainalysqan degen jala jabylyp, 14 jylǵa bas bostandyǵynan aiyrady. «Biz týysymyzdyń izine túskenin birden túsindik. Bir kúni Erbol joǵalyp ketti. Biz izdei bastadyq. Ony eki apta boiy taba almadyq. Sosyn bizge UQK qyzmetkeri habarlasyp, Esboldyń qaýipsiz úide otyrǵanyn aitty jáne ony jaqynda erkine qoia beretinin aitty. Biraq ony bosatatyn kúni Esboldyń jańadan salynyp jatqan úiine avtomat, kóligine tapansha salyp qoiady. Osylaisha UQK sýyq qarýlardy ózi tapqan bolyp, sony alǵa tartyp túrmege otyrǵyzdy», - deidi Esboldyń týysy Ádilhan Shyntasov.
Aita keteiik, biylǵy naýryzdyń ortasynda Qarjy monitoringi Bolat Nazarbaevqa jáne Nursultan Nazarbaevtyń kúieý balasy Qairat Sháripbaevqa qatysy bar zańsyz maining fermalar tabylǵanyn habarlaǵan bolatyn.
«Tekserý barysynda 55 maining fermasy óz erkimen jumysyn toqtatty jáne jabdyqtaryn alyp tastady. Olarǵa qaita bastaýǵa ruqsat etilmeidi. 51 kompaniia zańsyz jumys istedi. Olar elektr jelisine zańsyz qosylǵan, arnaiy ekonomikalyq aimaqtarda zańsyz ornalastyrylǵan, salyq pen kedendik baj salyǵynan jaltarǵan. Olardyń barlyǵy elektr qýatynan ajyratyldy», - dep habarlady Qarjy monitoringi agenttigi.
Agenttiktiń habarlaýynsha, maining jabdyqtary Ońtústik Koreia, Túrkiia, Grýziia, Singapýr jáne Qytaidan kontrabandalyq jolmen ákelingen. Qytaidan 2,8 mlrd teńge somasyna myńnan astam maining jabdyqtary Almatydaǵy maining fermaǵa kontrabandalyq jolmen ákelingen.
«Qańtar oqiǵasynan» keiin elimizdiń túkpir-túkpirinen Bolat Nazarbaevtan zábir kórgen azamattar BAQ betine shyǵyp, onyń qiianaty týraly aita bastady. Endeshe Bolat Nazarbaevtyń ústinen tergeý júrgizilýi bek múmkin.
