Qairat Satybaldy Qyrǵyzstannyń jyldyq biýdjetindei aqshany jymqyrǵan. Bul týraly saiasatker Bolat Ábilov Orda.kz-ke bergen suhbatynda aitty, - dep habarlaidy Dalanews.kz.
Ábilov Satybaldy 2 milliard dollar aqsha qaitarǵanyn atap ótti.
«Ol aqshanyń bárin qaidan aldy? 90-jyldary meniń aldyma kelgen (Qairat Satybaldy), biz ony Avstriiaǵa oqýǵa jiberdik. Talantsyz, bilimsiz adam edi. Al endi 2 milliardtyń iesi bolyp otyr. Memleketke 2 milliard qaitardy, al áli qaitarmaǵany qanshama? Ol áli sýper bai adam. Áýlettiń adamdary óte ashkóz. Bárin jaqsy bilemin. Olar alyp úirengen, solai bolýy kerek dep esepteidi. Iaǵni prezident 30 jyl eldi basqarady, bári tek solarǵa tiesili dep oilaidy. Bárine "óz eńbegimizben jettik" dep esepteidi. Sondyqtan áli qaltasynda birneshe milliardy qaldy dep oilaimyn. Sebebi Satybaldynyń qolastyndaǵy adamnyń kriptasynda 500 million dollar tabylǵan bolatyn. Ol aktivterin qolastyndaǵylardyń shotyna salyp qoiǵan», - deidi Ábilov.
Bolat Ábilovtiń sózinshe, Qairat Satybaldynyń bostandyqqa shyǵýy týraly sheshim shyǵarǵandar onymen kelisimge kelgen bolýy múmkin.
«Qairat, kelisip alaiyq, sen 2 milliard dollardai qaitarasyń» degen. Osylaisha Satybaldy birtindep qaitarǵan. Mende basqa suraq týyndaidy: sonda basqalary qansha qaitarýy kerek? Meniń oiymsha, áýlettegiler Qairattyń aqshasyn qaitarý arqyly memleketpen eseptesken. Qyzdar, kúieýbalalar eshqandai aqsha qaitarmaidy. Árine, bul qoǵamǵa unamasy belgili. Qairat osynsha qaitarsa, sonda qyzdary, kúieýbalalar qansha qaitarýy kerek? Prezidenttiń (eks) ózi qansha qaitarýy kerek edi?», - deidi Ábilov.
Sonymen qatar, Bolat Ábilov Qairat Satybaldy jańa jylǵa deiin demalyp, odan keiin kásipterin qaitadan qolǵa alatynyn aitady.
«Artynan biznes jobalaryn qolǵa alady. Sebebi ózinde qalǵan bailyǵy az emes. Onyń búkil komandasy bostandyqta. Kásippen ainalysýyn jalǵastyrady», - deidi saiasatker.
