قايرات ساتىبالدى قىرعىزستاننىڭ جىلدىق بيۋدجەتىندەي اقشانى جىمقىرعان. بۇل تۋرالى ساياساتكەر بولات ءابىلوۆ Orda.kz-كە بەرگەن سۇحباتىندا ايتتى، - دەپ حابارلايدى Dalanews.kz.
ءابىلوۆ ساتىبالدى 2 ميلليارد دوللار اقشا قايتارعانىن اتاپ ءوتتى.
«ول اقشانىڭ ءبارىن قايدان الدى؟ 90-جىلدارى مەنىڭ الدىما كەلگەن (قايرات ساتىبالدى)، ءبىز ونى اۆسترياعا وقۋعا جىبەردىك. تالانتسىز، ءبىلىمسىز ادام ەدى. ال ەندى 2 ميللياردتىڭ يەسى بولىپ وتىر. مەملەكەتكە 2 ميلليارد قايتاردى، ال ءالى قايتارماعانى قانشاما؟ ول ءالى سۋپەر باي ادام. اۋلەتتىڭ ادامدارى وتە اشكوز. ءبارىن جاقسى بىلەمىن. ولار الىپ ۇيرەنگەن، سولاي بولۋى كەرەك دەپ ەسەپتەيدى. ياعني پرەزيدەنت 30 جىل ەلدى باسقارادى، ءبارى تەك سولارعا تيەسىلى دەپ ويلايدى. بارىنە "ءوز ەڭبەگىمىزبەن جەتتىك" دەپ ەسەپتەيدى. سوندىقتان ءالى قالتاسىندا بىرنەشە ميللياردى قالدى دەپ ويلايمىن. سەبەبى ساتىبالدىنىڭ قولاستىنداعى ادامنىڭ كريپتاسىندا 500 ميلليون دوللار تابىلعان بولاتىن. ول اكتيۆتەرىن قولاستىنداعىلاردىڭ شوتىنا سالىپ قويعان»، - دەيدى ءابىلوۆ.
بولات ءابىلوۆتىڭ سوزىنشە، قايرات ساتىبالدىنىڭ بوستاندىققا شىعۋى تۋرالى شەشىم شىعارعاندار ونىمەن كەلىسىمگە كەلگەن بولۋى مۇمكىن.
«قايرات، كەلىسىپ الايىق، سەن 2 ميلليارد دوللارداي قايتاراسىڭ» دەگەن. وسىلايشا ساتىبالدى بىرتىندەپ قايتارعان. مەندە باسقا سۇراق تۋىندايدى: سوندا باسقالارى قانشا قايتارۋى كەرەك؟ مەنىڭ ويىمشا، اۋلەتتەگىلەر قايراتتىڭ اقشاسىن قايتارۋ ارقىلى مەملەكەتپەن ەسەپتەسكەن. قىزدار، كۇيەۋبالالار ەشقانداي اقشا قايتارمايدى. ارينە، بۇل قوعامعا ۇناماسى بەلگىلى. قايرات وسىنشا قايتارسا، سوندا قىزدارى، كۇيەۋبالالار قانشا قايتارۋى كەرەك؟ پرەزيدەنتتىڭ (ەكس) ءوزى قانشا قايتارۋى كەرەك ەدى؟»، - دەيدى ءابىلوۆ.
سونىمەن قاتار، بولات ءابىلوۆ قايرات ساتىبالدى جاڭا جىلعا دەيىن دەمالىپ، ودان كەيىن كاسىپتەرىن قايتادان قولعا الاتىنىن ايتادى.
«ارتىنان بيزنەس جوبالارىن قولعا الادى. سەبەبى وزىندە قالعان بايلىعى از ەمەس. ونىڭ بۇكىل كومانداسى بوستاندىقتا. كاسىپپەن اينالىسۋىن جالعاستىرادى»، - دەيدى ساياساتكەر.
