Belgili saiasatker, memleket qairatkeri Amalbek Tshanov burynǵy prezident Nursultan Nazarbaevtyń keńesshisi bolyp qyzmet etker kezi týraly aitty, dep habarlaidy Dalanews.kz.
"Men ol kezde úlken birlestiktiń bas direktorymyn, sonymen qatar, Joǵary keńestiń depýtatymyn, áli jaspyn. Oǵan deiin saiasatqa aralasý oiymda bolǵan joq. Sebebi men úshin óndiriste jumys isteý baqyt bolatyn. Keiinnen maǵan sondai usynys (Nazarbaevtyń keńesshisi bolý týraly) boldy. Árine, men qýana qarsy aldym. Jańadan prezident sailanǵan, men Joǵary keńestiń depýtaty esebinde bárine qatystym. Ońtústik Qazaqstannyń ókili bolyp bardym. Bar peiilimizben Nursultan Ábishulynyń prezident bolýyna aianbai qyzmet ettik. Onyń bárin jurtqa túsindirdik" - deidi Amalbek Tshanov Barys media-ǵa bergen suhbatynda.
Tshanov Nazarbaev talantty adam bolǵanyn aitady.
"Bilimi jaǵynan eshnárse aita almaimyn. Biraq oǵan Allanyń bergen talanty bar. Qandai top bolsa da sol jerge kirip ketedi, dombyra da tarta salady, óleń de aita salady. Sol talanty bárimizge aidai kórindi. Álemdegi aldyńǵy qatarly el bolamyz degen oi bárimizde boldy. Sonyń qasynda júrgenimizge maqtandyq. Keiin maǵan qalaǵa ákim bolýǵa usynys jasady. Aldyna baryp jumys suramadym, oilamaǵan jerde qalaǵa ákim etti. Maǵan bergen senimdi aqtaý úshin uiqysyz jumys istedim", - deidi saiasatker.
Amalbek Tshanov Nazarbaevtyń peiili buzylǵanyn 2007 jyly bilgenin aitady.
"Bul kisiniń piǵyly ózgergenin 2007 jyly baiqadym. Men barlyq jerge ózimdi usynyp depýtat boldym. Biraq maǵan prezident tarapynan Tshanovty ótkizbe degen qarsylyq bolǵan joq. Maǵan qarsylyq jasaǵan - marqum Sultan Sarybaiuly, onyń orynbasary Turysbekov. Ekeýi kóp kedergi jasady. Solar prezidentke kirip, Tshanovty ótkizýge bolmaidy degen eken. Biraq prezident "ózi ótetin bolsa kedergi keltirmeńder" depti.
Keiinnen jemqorlyq osy kisiniń basshylyǵymen bastaldy ǵoi. 2007 jyly bizdi taratqannan keiin partiialyq tizim bastaldy. "Otan" partiiasy qurylyp, onyń atyn jamylyp aldy. Sodan keiin bárin bildim. Burynǵy pikirim men qazirgi pikirim keiingi tirlikterine qarap, ózgerdi. Ony aiqailap aitatyn tirlik emes, jurttyń bári aityp jatyr ǵoi. Bir nárseni ǵana túsinbeimin: óz elińdi sonsha tonaýǵa bola ma? Milliardtar, trilliondar... Qazir qarap otyrsam meniń miyma kirmeidi. Mysaly qazir Qairat Satybaldyny sottap jatyr. Solar milliardtar ákelip berip jatyr. Sony qai qolymen urlady, qai qolymen jinady? Sonyń bárine jol ashylyp berildi ǵoi. Adam esebinde sony túsinbeimin", - deidi Amalbek Tshanov.
