بەلگىلى ساياساتكەر، مەملەكەت قايراتكەرى امالبەك تشانوۆ بۇرىنعى پرەزيدەنت نۇرسۇلتان نازاربايەۆتىڭ كەڭەسشىسى بولىپ قىزمەت ەتكەر كەزى تۋرالى ايتتى، دەپ حابارلايدى Dalanews.kz.

"مەن ول كەزدە ۇلكەن بىرلەستىكتىڭ باس ديرەكتورىمىن، سونىمەن قاتار، جوعارى كەڭەستىڭ دەپۋتاتىمىن، ءالى جاسپىن. وعان دەيىن ساياساتقا ارالاسۋ ويىمدا بولعان جوق. سەبەبى مەن ءۇشىن وندىرىستە جۇمىس ىستەۋ باقىت بولاتىن. كەيىننەن ماعان سونداي ۇسىنىس (نازاربايەۆتىڭ كەڭەسشىسى بولۋ تۋرالى) بولدى. ارينە، مەن قۋانا قارسى الدىم. جاڭادان پرەزيدەنت سايلانعان، مەن جوعارى كەڭەستىڭ دەپۋتاتى ەسەبىندە بارىنە قاتىستىم. وڭتۇستىك قازاقستاننىڭ وكىلى بولىپ باردىم. بار پەيىلىمىزبەن نۇرسۇلتان ءابىش ۇلىنىڭ پرەزيدەنت بولۋىنا ايانباي قىزمەت ەتتىك. ونىڭ ءبارىن جۇرتقا تۇسىندىردىك" - دەيدى امالبەك تشانوۆ Barys media-عا بەرگەن سۇحباتىندا.

تشانوۆ نازاربايەۆ تالانتتى ادام بولعانىن ايتادى.

"ءبىلىمى جاعىنان ەشنارسە ايتا المايمىن. ءبىراق وعان اللانىڭ بەرگەن تالانتى بار. قانداي توپ بولسا دا سول جەرگە كىرىپ كەتەدى، دومبىرا دا تارتا سالادى، ولەڭ دە ايتا سالادى. سول تالانتى بارىمىزگە ايداي كورىندى. الەمدەگى الدىڭعى قاتارلى ەل بولامىز دەگەن وي بارىمىزدە بولدى. سونىڭ قاسىندا جۇرگەنىمىزگە ماقتاندىق. كەيىن ماعان قالاعا اكىم بولۋعا ۇسىنىس جاسادى. الدىنا بارىپ جۇمىس سۇرامادىم، ويلاماعان جەردە قالاعا اكىم ەتتى. ماعان بەرگەن سەنىمدى اقتاۋ ءۇشىن ۇيقىسىز جۇمىس ىستەدىم"، - دەيدى ساياساتكەر.

امالبەك تشانوۆ نازاربايەۆتىڭ پەيىلى بۇزىلعانىن 2007 جىلى بىلگەنىن ايتادى. 

"بۇل كىسىنىڭ پيعىلى وزگەرگەنىن 2007 جىلى بايقادىم. مەن بارلىق جەرگە ءوزىمدى ۇسىنىپ دەپۋتات بولدىم. ءبىراق ماعان پرەزيدەنت تاراپىنان تشانوۆتى وتكىزبە دەگەن قارسىلىق بولعان جوق. ماعان قارسىلىق جاساعان - مارقۇم  سۇلتان سارىباي ۇلى، ونىڭ ورىنباسارى تۇرىسبەكوۆ. ەكەۋى كوپ كەدەرگى جاسادى. سولار پرەزيدەنتكە كىرىپ، تشانوۆتى وتكىزۋگە بولمايدى دەگەن ەكەن. ءبىراق پرەزيدەنت "ءوزى وتەتىن بولسا كەدەرگى كەلتىرمەڭدەر" دەپتى. 

كەيىننەن جەمقورلىق وسى كىسىنىڭ باسشىلىعىمەن باستالدى عوي. 2007 جىلى ءبىزدى تاراتقاننان كەيىن پارتيالىق ءتىزىم باستالدى. "وتان" پارتياسى قۇرىلىپ، ونىڭ اتىن جامىلىپ الدى. سودان كەيىن ءبارىن ءبىلدىم. بۇرىنعى پىكىرىم مەن قازىرگى پىكىرىم كەيىنگى تىرلىكتەرىنە قاراپ، وزگەردى. ونى ايقايلاپ ايتاتىن تىرلىك ەمەس، جۇرتتىڭ ءبارى ايتىپ جاتىر عوي. ءبىر نارسەنى عانا تۇسىنبەيمىن: ءوز ەلىڭدى سونشا توناۋعا بولا ما؟ ميللياردتار، تريلليوندار... ءقازىر قاراپ وتىرسام مەنىڭ ميىما كىرمەيدى. مىسالى ءقازىر قايرات ساتىبالدىنى سوتتاپ جاتىر. سولار ميللياردتار اكەلىپ بەرىپ جاتىر. سونى قاي قولىمەن ۇرلادى، قاي قولىمەن جينادى؟ سونىڭ بارىنە جول اشىلىپ بەرىلدى عوي. ادام ەسەبىندە سونى تۇسىنبەيمىن"، - دەيدى امالبەك تشانوۆ.