Qazaqstandyq kásipker jáne saiasatker Bolat Ábilov eks-ministr Qýandyq Bishimbaevpen kezdesýi jáne Bishimbaev pen Nazarbaevtyń bailanysy týraly aitty, - dep habarlaidy Dalanews.kz.
Ábilov Bishimbaevpen ol túrmege otyrar aldynda kezdeskenin, alǵashynda intellegentti azamat bolyp kóringenin aitady.
«Bizge solai kórindi. Óte tárbieli adam bolyp kórindi. Ol «Báiterekte» (holding) bolǵan, sol kezde «BRK» bankke kredit alýdy josparlap júrgenbiz. Keiinirek ol basqalarmen qalai sóilesetinin estidik: mádenietsiz, dóreki eken. «Patsan» bola tura memlekettik qyzmette joǵary dárejege jetken adam, biraq bul da ádiletsiz, orynsyz bolǵan nárse. Eski Qazaqstannyń ózi «eskiler» jáne «Bolashaqtyń elitalary» dep bólinip júrgende, olar (Bolashaq túlekteri) bilikke talasyp, ózin premer-ministr kóre bastaǵanda eski elita Baibekke de, Bishimbaevqa da qylmystyq isti artyp qoimaq bolǵan. Bishimbaev – eski Qazaqstannyń taýary, ol Nazarbaev ósirgen bala. Bul jeke maqsattaǵy másele. Memlekettik tóńkeris jasamaq bolǵan Másimov Ulttyq qaýipsizdikke jaýap bergen. Al Qýandyq Bishimbaev áieline kómektesip, jedel járdem shaqyrýdyń ornyna kóripkelge habarlasa bastaǵan. Bul - jaman piǵyldy adamdar», - deidi Ábilov «Giperborei» YouTube-arnasyna bergen suhbatynda.
Sonymen qatar, Bolat Ábilov Bishimbaev pen Nazarbaevtyń bailanysy týraly aitty.
«Bishimbaev – Nazarbaevtyń erkesi bolǵan. Senim artatyn adamy bolǵan. Ol Nazarbaevtyń kómekshisi bolǵan. Nazarbaevqa unap, Nazarbaev ony damyta bastady. Biraq Bishimbaev eshbir qyzmetinde nátije kórsetpegen. Korrýptsiiamen ainalysyp, «Bolashaqty» birge bitirgen adamdaryn qyzmetke qoiyp, qaltasyn tompaityp júrgen. Premer-ministr bolǵysy kelgen», - deidi Bolat Ábilov.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha sot otyrysy áli de jalǵasyp jatyr. Ony dúiim jurt Joǵarǵy sottyń YouTube kanalynan onlain tamashalaýda.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Aliia Omarova.
Eske salaiyq, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy: asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý); qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Sondai-aq onyń týysy Baqytjan Baijanov ta kúdikti retinde qamaýǵa alyndy. Oǵan qylmystyq kodekstiń eki baby boiynsha aiyp taǵylǵan. Naqtyraq aitsaq, 432-baby (asa aýyr qylmysty jasyryp qalý); 434-baby (asa aýyr qylmysty habarlamaý).
