12 qańtar kúngi úkimet otyrysy kezinde Ekologiia, geologiia jáne tabiǵi resýrstar ministri Serikqali Brekeshev ýtilizatsiia alymyn jinaityn "Operator ROP" kompaniiasyna keiingi bes jylda 691,9 mlrd teńge qarajat túskenin aitty. Onyń aitýynsha, túsken qarjy "zańǵa sáikes jumsalǵan".
– 2016 jyldan búgingi kúnge deiingi kezeńde kádege jaratý túrinde túsken tólem kólemi 691,9 mlrd teńgeni qurady. Alynǵan qarajat Qazaqstan Respýblikasynyń qoldanystaǵy zańyna sáikes jumsaldy. Atap aitqanda, otandyq avtokólik óndirýshilerge – 338,9 mlrd teńge mólsherinde kádege jaratý túrindegi buryn tólegen qarajattary qaitaryldy. Ekologiialyq máselelerdi sheshýge 102 mlrd teńge jáne salyqtarǵa 49,1 mlrd teńge jumsaldy. Búgingi tańda qarajat qaldyǵy – ekinshi deńgeili bankterde 220,6 mlrd teńgeni quraidy, – dedi ministr.
Bir kún buryn prezident Qasym-Jomart Toqaev ýtilizatsiia alymyn jinaýmen jeke kompaniia emes, memlekettik organ ainalýy tiis dep málimdep, atalǵan kompaniiany jabýdy tapsyrǵan. "Operator ROP" kompaniiasynyń birinshi prezident Nursultan Nazarbaevtyń kishi qyzy Áliia Nazarbaevamen bailanysy bar dep aitylady.
Serikqali Brekeshevtiń aitýynsha, úkimet ýtilizatsiia alymyn jinaityn operator qurýdyń eki jolyn qarastyryp jatyr: alymdy jinaýmen jeke memlekettik operator ainalysady iaki ol úshin ónerkásiptik damý qory janynan qor qurylady.
Buǵan qosa, ýtilizatsiialyq tólem koeffitsienti qaita qaralyp, otandyq kólikterdi satyp alýshylarǵa ýtilizatsiialyq alym esebinen vaýcher usyný máselesi qarastyrylady.
Resmi málimet boiyna, "Operator ROP" kompaniiasy 2015 jyly 30 jeltoqsanda Ekologiia kodeksiniń 387-babyna sáikes, úkimet qaýlysymen qurylǵan.
Elde avtokólik ieleri jyldar boiy ýtilizatsiialyq alymǵa qarsylyq bildirip kelgen. 2021 jyly #NetÝtilsborý qozǵalysy bastaldy.
