– 2016 جىلدان بۇگىنگى كۇنگە دەيىنگى كەزەڭدە كادەگە جاراتۋ تۇرىندە تۇسكەن تولەم كولەمى 691،9 ملرد تەڭگەنى قۇرادى. الىنعان قاراجات قازاقستان رەسپۋبليكاسىنىڭ قولدانىستاعى زاڭىنا سايكەس جۇمسالدى. اتاپ ايتقاندا، وتاندىق اۆتوكولىك وندىرۋشىلەرگە – 338،9 ملرد تەڭگە مولشەرىندە كادەگە جاراتۋ تۇرىندەگى بۇرىن تولەگەن قاراجاتتارى قايتارىلدى. ەكولوگيالىق ماسەلەلەردى شەشۋگە 102 ملرد تەڭگە جانە سالىقتارعا 49،1 ملرد تەڭگە جۇمسالدى. بۇگىنگى تاڭدا قاراجات قالدىعى – ەكىنشى دەڭگەيلى بانكتەردە 220،6 ملرد تەڭگەنى قۇرايدى، – دەدى مينيستر.

ءبىر كۇن بۇرىن پرەزيدەنت قاسىم-جومارت توقايەۆ ۋتيليزاسيا الىمىن جيناۋمەن جەكە كومپانيا ەمەس، مەملەكەتتىك ورگان اينالۋى ءتيىس دەپ مالىمدەپ، اتالعان كومپانيانى جابۋدى تاپسىرعان. "وپەراتور روپ" كومپانياسىنىڭ ءبىرىنشى پرەزيدەنت نۇرسۇلتان نازاربايەۆتىڭ كىشى قىزى ءاليا نازاربايەۆامەن بايلانىسى بار دەپ ايتىلادى.

سەرىكقالي برەكەشيەۆتىڭ ايتۋىنشا، ۇكىمەت ۋتيليزاسيا الىمىن جينايتىن وپەراتور قۇرۋدىڭ ەكى جولىن قاراستىرىپ جاتىر: الىمدى جيناۋمەن جەكە مەملەكەتتىك وپەراتور اينالىسادى ياكي ول ءۇشىن ونەركاسىپتىك دامۋ قورى جانىنان قور قۇرىلادى.

بۇعان قوسا، ۋتيليزاسيالىق تولەم كوەففيسيەنتى قايتا قارالىپ، وتاندىق كولىكتەردى ساتىپ الۋشىلارعا ۋتيليزاسيالىق الىم ەسەبىنەن ۆاۋچەر ۇسىنۋ ماسەلەسى قاراستىرىلادى.

رەسمي مالىمەت بويىنا، "وپەراتور روپ" كومپانياسى 2015 جىلى 30 جەلتوقساندا ەكولوگيا كودەكسىنىڭ 387-بابىنا سايكەس، ۇكىمەت قاۋلىسىمەن قۇرىلعان.

ەلدە اۆتوكولىك يەلەرى جىلدار بويى ۋتيليزاسيالىق الىمعا قارسىلىق ءبىلدىرىپ كەلگەن. 2021 جىلى #نەتۋتيلسبورۋ قوزعالىسى باستالدى.