Májilis depýtaty Ermurat Bapi insaiderlik aqparat kózine súiene otyryp, Nazarbaevtyń nemere inisi Samat Ábish shartty túrde sottalǵanyn málimdedi, - dep habarlaidy Dalanews.kz.
Bapidiń sózine súiensek, 26 aqpanda Ulttyq qaýipsizdik komiteti tóraǵasynyń eks-birinshi orynbasary Samat Ábish jabyq sottyń sheshimimen 8 jylǵa shartty túrde sottalǵan. Sonymen qatar, "DAT" insaiderlik aqparat kózine súienip, Ábishtiń general ataǵy men memlekettik marapattary alynǵanyn, biraq menshik-múlkine konfiskatsiia jasalmaǵanyn málimdedi.
Depýtattyń aitýynsha, buǵan deiin Qazaqstanda eshkim 8 jylǵa shartty túrde sottalmaǵan. Al 2022 jylǵy qańtarǵa deiin Samat Ábish UQK tóraǵasynyń birinshi orynbasary qyzmetin atqardy.
"Soǵan qaraǵanda, múddeli bireýler "8 jyl" degen edáýir jazamen qoǵamdy aldarqatyp, al shyndyǵynda Samat Ábishti túrme jazasynan alyp qalǵan. Qańtar oqiǵasyna birden-bir kináli kúshtik qurylymnyń joǵary dárejeli laýazymgeri osylaisha tiisti jazadan qutyldy. Álbette, bul "komediianyń" basty rejisseri Nursultan Nazarbaev ekeni taiǵa tańba basqandai aian jaǵdai.
Eń qiyny – bul Ádiletti Qazaqstan qurý bastamasyn alǵa qoiǵan qazirgi Prezidentimiz Qasym-Jomart Toqaevtyń bedeline belgili bir deńgeide nuqsan keltirip, halyqtyń onsyz da tómen bilikke degen senimine taǵy bir úlken syzat túsirgeli tur.
Jaǵdai osylai jalǵasa berse, Táýelsiz Qazaqstan tarihyndaǵy eń qaiǵyly oqiǵa – Qańtar qasiretin uiymdastyrǵan qylmyskerler túk bolmaǵandai, Samat siiaqty sairan salyp, tairań qaǵyp, menshik-múlikteri de tárkilenbei, emin-erkin júre beretin bolsa, kerisinshe, eshnárseni búldirmegen, eshqandai qylmysy joq qoǵam belsendileri jazyqsyz qýdalanyp, naqty jazaǵa tartyla beretin bolsa, onda – jańa Qazaqstannyń tańy jaqyn jyldarda ata qoimaityny anyq.
Bul qazaq qoǵamyn ábden yzalandyryp, halyqtyq kóteriliske soqtyrýy bek múmkin! Otyz jyl boiy álaýlaiym taýsylsa, hálaýlaiym bar degen bitpes ertegige aldanyp kelgen halyq endi otyz kún aldaýǵa da kóne qoimas!" - dedi depýtat.
Ermurat Bapi Memleket basshysynyń jyl basynda "Egemen Qazaqstan" gazetine bergen suhbatynda aitqan myna pikirin keltiredi: "...Bir sózben aitsaq, eski júie kelmeske ketti. Qazaqstandaǵy saiasi reformalar júieli ǵana emes, eshqashan keri qaitpaityn túbegeili sipatqa ie boldy dep senimmen aita alamyz. Munyń elimiz úshin airyqsha mańyzy bar. Sebebi ulttyń saiasi sana-sezimi túbegeili ózgerdi. Jurttyń quqyqtyq saýattylyǵy men belsendiligi demokratiialyq jańǵyrýdyń basty kepiline ainaldy. Toqeterin aitsaq, keri ketýge halyqtyń ózi jol bermeidi jáne elge jańa lep ákelgen osy ózgeristerdi tabandylyqpen qorǵaidy. Men buǵan bek senimdimin».
Sonymen qatar, depýtat Qańtarǵa qatysy bar qaltalylar óz deńgeiinde jaýapqa tartylmasa, opa ákelmeitinin jetkizdi.
"Budan uǵatyn taǵy bir kereǵar oi – Samat Ábishke qatysty eski júieniń áli eshqaida kete qoimaǵany! Eger ádiletti, jańa júie qalyptasty desek, onda tek UQK tóraǵasynyń burynǵy birinshi orynbasary ǵana emes, 238 adam qaza taýyp, milliardtaǵan materialdyq shyǵyn ákelgen Qańtar qasiretine jaýapty úlkendi-kishili barlyq shendiler túgeldei jaýapqa tartylyp, tiisti jazalaryn alýlary kerek edi. Úlken ókinishke qarai, áli olai bolmai tur. Otyz jyl boiy qara halyqty zar qaqsatyp, elimizdiń bar bailyǵyn baýyryna basqan eski Qazaqstannyń ókilderi buǵan barynsha qarsylyq kórsetip, ótkendi ańsap, soǵan qaityp kelýge tyrysyp baǵýda. "Qamysty bos ustasań, qolyńdy kesedi" deidi qazaq danalyǵy.
Eger jańa Qazaqstan eski Qazaqstanǵa qatysty solqyldaqtyq tanytyp, burynǵy prezidenttiń mańyna toptasqan, 220 trillion teńgeni zańsyz iemdengen, aqyr sońynda Qańtar qasiretin uiymdastyrǵan oligarhtardy qylmysyna sai jaýapqa tartpasa, bul eshqandai jaqsylyqqa ákelmeidi", - dedi Bapi.
Samat Ábishtiń ústinen Qylmystyq kodeksi 362-baby 4-bóligi boiynsha ("Bilikti nemese laýazymdy ókilettikterdi asyra paidalaný") qylmystyq is qozǵalǵan edi.
Al jýyrda bas prokýrordyń orynbasary Áset Shyndaliev eks-prezident Nursultan Nazarbaevtyń nemere inisi Samat Ábish Qazaqstannan ketpegenin málimdegen edi.
Eske salaiyq, buǵan deiin "Dikii Arman" qańtarda Samat Ábishtiń qandai buiryǵyn oryndaǵany belgili bolǵan edi. Bul týraly Qańtar oqiǵasynan keiin jappai tártipsizdikterdi uiymdastyrdy dep aiyptalǵan polkovnik Rýslan Ysqaqov "Novaia Gazetaǵa" aityp berdi.
Rýslan Ysqaqov qańtar oqiǵasyna bailanysty ótken sot otyrystarynyń birinde Samat Ábishtiń buiryǵyn oryndaǵanyn aitty. Ábishtiń buiryǵymen Ysqaqov Dikii Armandy bul iske tartqan kórinedi. Jumageldiev qylmys álemine qatysy bar jáne Nazarbaevtar áýletiniń tapsyrmasyn oryndaýshy retinde belgili.
