ءماجىلىس دەپۋتاتى ەرمۇرات باپي ينسايدەرلىك اقپارات كوزىنە سۇيەنە وتىرىپ، نازاربايەۆتىڭ نەمەرە ءىنىسى سامات ءابىش شارتتى تۇردە سوتتالعانىن مالىمدەدى، - دەپ حابارلايدى Dalanews.kz.
ءباپيدىڭ سوزىنە سۇيەنسەك، 26 اقپاندا ۇلتتىق قاۋىپسىزدىك كوميتەتى ءتوراعاسىنىڭ ەكس-بىرىنشى ورىنباسارى سامات ءابىش جابىق سوتتىڭ شەشىمىمەن 8 جىلعا شارتتى تۇردە سوتتالعان. سونىمەن قاتار، "دات" ينسايدەرلىك اقپارات كوزىنە سۇيەنىپ، ءابىشتىڭ گەنەرال اتاعى مەن مەملەكەتتىك ماراپاتتارى الىنعانىن، ءبىراق مەنشىك-مۇلكىنە كونفيسكاسيا جاسالماعانىن مالىمدەدى.
دەپۋتاتتىڭ ايتۋىنشا، بۇعان دەيىن قازاقستاندا ەشكىم 8 جىلعا شارتتى تۇردە سوتتالماعان. ال 2022 جىلعى قاڭتارعا دەيىن سامات ءابىش ۇقك ءتوراعاسىنىڭ ءبىرىنشى ورىنباسارى قىزمەتىن اتقاردى.
"سوعان قاراعاندا، مۇددەلى بىرەۋلەر "8 جىل" دەگەن ەداۋىر جازامەن قوعامدى الدارقاتىپ، ال شىندىعىندا سامات ءابىشتى تۇرمە جازاسىنان الىپ قالعان. قاڭتار وقيعاسىنا بىردەن-بىر كىنالى كۇشتىك قۇرىلىمنىڭ جوعارى دارەجەلى لاۋازىمگەرى وسىلايشا ءتيىستى جازادان قۇتىلدى. البەتتە، بۇل "كومەديانىڭ" باستى رەجيسسەرى نۇرسۇلتان نازاربايەۆ ەكەنى تايعا تاڭبا باسقانداي ايان جاعداي.
ەڭ قيىنى – بۇل ادىلەتتى قازاقستان قۇرۋ باستاماسىن العا قويعان قازىرگى پرەزيدەنتىمىز قاسىم-جومارت توقايەۆتىڭ بەدەلىنە بەلگىلى ءبىر دەڭگەيدە نۇقسان كەلتىرىپ، حالىقتىڭ ونسىز دا تومەن بيلىككە دەگەن سەنىمىنە تاعى ءبىر ۇلكەن سىزات تۇسىرگەلى تۇر.
جاعداي وسىلاي جالعاسا بەرسە، تاۋەلسىز قازاقستان تاريحىنداعى ەڭ قايعىلى وقيعا – قاڭتار قاسىرەتىن ۇيىمداستىرعان قىلمىسكەرلەر تۇك بولماعانداي، سامات سياقتى سايران سالىپ، تايراڭ قاعىپ، مەنشىك-مۇلىكتەرى دە تاركىلەنبەي، ەمىن-ەركىن جۇرە بەرەتىن بولسا، كەرىسىنشە، ەشنارسەنى بۇلدىرمەگەن، ەشقانداي قىلمىسى جوق قوعام بەلسەندىلەرى جازىقسىز قۋدالانىپ، ناقتى جازاعا تارتىلا بەرەتىن بولسا، وندا – جاڭا قازاقستاننىڭ تاڭى جاقىن جىلداردا اتا قويمايتىنى انىق.
بۇل قازاق قوعامىن ابدەن ىزالاندىرىپ، حالىقتىق كوتەرىلىسكە سوقتىرۋى بەك مۇمكىن! وتىز جىل بويى ءالاۋلايىم تاۋسىلسا، ءحالاۋلايىم بار دەگەن بىتپەس ەرتەگىگە الدانىپ كەلگەن حالىق ەندى وتىز كۇن الداۋعا دا كونە قويماس!" - دەدى دەپۋتات.
ەرمۇرات باپي مەملەكەت باسشىسىنىڭ جىل باسىندا "ەگەمەن قازاقستان" گازەتىنە بەرگەن سۇحباتىندا ايتقان مىنا پىكىرىن كەلتىرەدى: "...ءبىر سوزبەن ايتساق، ەسكى جۇيە كەلمەسكە كەتتى. قازاقستانداعى ساياسي رەفورمالار جۇيەلى عانا ەمەس، ەشقاشان كەرى قايتپايتىن تۇبەگەيلى سيپاتقا يە بولدى دەپ سەنىممەن ايتا الامىز. مۇنىڭ ەلىمىز ءۇشىن ايرىقشا ماڭىزى بار. سەبەبى ۇلتتىڭ ساياسي سانا-سەزىمى تۇبەگەيلى وزگەردى. جۇرتتىڭ قۇقىقتىق ساۋاتتىلىعى مەن بەلسەندىلىگى دەموكراتيالىق جاڭعىرۋدىڭ باستى كەپىلىنە اينالدى. توقەتەرىن ايتساق، كەرى كەتۋگە حالىقتىڭ ءوزى جول بەرمەيدى جانە ەلگە جاڭا لەپ اكەلگەن وسى وزگەرىستەردى تاباندىلىقپەن قورعايدى. مەن بۇعان بەك سەنىمدىمىن».
سونىمەن قاتار، دەپۋتات قاڭتارعا قاتىسى بار قالتالىلار ءوز دەڭگەيىندە جاۋاپقا تارتىلماسا، وپا اكەلمەيتىنىن جەتكىزدى.
"بۇدان ۇعاتىن تاعى ءبىر كەرەعار وي – سامات ابىشكە قاتىستى ەسكى جۇيەنىڭ ءالى ەشقايدا كەتە قويماعانى! ەگەر ادىلەتتى، جاڭا جۇيە قالىپتاستى دەسەك، وندا تەك ۇقك ءتوراعاسىنىڭ بۇرىنعى ءبىرىنشى ورىنباسارى عانا ەمەس، 238 ادام قازا تاۋىپ، ميللياردتاعان ماتەريالدىق شىعىن اكەلگەن قاڭتار قاسىرەتىنە جاۋاپتى ۇلكەندى-كىشىلى بارلىق شەندىلەر تۇگەلدەي جاۋاپقا تارتىلىپ، ءتيىستى جازالارىن الۋلارى كەرەك ەدى. ۇلكەن وكىنىشكە قاراي، ءالى ولاي بولماي تۇر. وتىز جىل بويى قارا حالىقتى زار قاقساتىپ، ەلىمىزدىڭ بار بايلىعىن باۋىرىنا باسقان ەسكى قازاقستاننىڭ وكىلدەرى بۇعان بارىنشا قارسىلىق كورسەتىپ، وتكەندى اڭساپ، سوعان قايتىپ كەلۋگە تىرىسىپ باعۋدا. "قامىستى بوس ۇستاساڭ، قولىڭدى كەسەدى" دەيدى قازاق دانالىعى.
ەگەر جاڭا قازاقستان ەسكى قازاقستانعا قاتىستى سولقىلداقتىق تانىتىپ، بۇرىنعى پرەزيدەنتتىڭ ماڭىنا توپتاسقان، 220 تريلليون تەڭگەنى زاڭسىز يەمدەنگەن، اقىر سوڭىندا قاڭتار قاسىرەتىن ۇيىمداستىرعان وليگارحتاردى قىلمىسىنا ساي جاۋاپقا تارتپاسا، بۇل ەشقانداي جاقسىلىققا اكەلمەيدى"، - دەدى باپي.
سامات ءابىشتىڭ ۇستىنەن قىلمىستىق كودەكسى 362-بابى 4-بولىگى بويىنشا ("بيلىكتى نەمەسە لاۋازىمدى وكىلەتتىكتەردى اسىرا پايدالانۋ") قىلمىستىق ءىس قوزعالعان ەدى.
ال جۋىردا باس پروكۋروردىڭ ورىنباسارى اسەت شىندالييەۆ ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى سامات ءابىش قازاقستاننان كەتپەگەنىن مالىمدەگەن ەدى.
ەسكە سالايىق، بۇعان دەيىن "ديكيي ارمان" قاڭتاردا سامات ءابىشتىڭ قانداي بۇيرىعىن ورىنداعانى بەلگىلى بولعان ەدى. بۇل تۋرالى قاڭتار وقيعاسىنان كەيىن جاپپاي تارتىپسىزدىكتەردى ۇيىمداستىردى دەپ ايىپتالعان پولكوۆنيك رۋسلان ىسقاقوۆ "نوۆايا گازەتاعا" ايتىپ بەردى.
رۋسلان ىسقاقوۆ قاڭتار وقيعاسىنا بايلانىستى وتكەن سوت وتىرىستارىنىڭ بىرىندە سامات ءابىشتىڭ بۇيرىعىن ورىنداعانىن ايتتى. ءابىشتىڭ بۇيرىعىمەن ىسقاقوۆ ديكيي ارماندى بۇل ىسكە تارتقان كورىنەدى. جۇماگەلدييەۆ قىلمىس الەمىنە قاتىسى بار جانە نازاربايەۆتار اۋلەتىنىڭ تاپسىرماسىن ورىنداۋشى رەتىندە بەلگىلى.
