Respýblikanyń birneshe aimaǵynda Qańtar oqiǵasy kezinde jaqyndary qaza bolǵan bir top adam 3 mamyrda Almatydaǵy "Taǵzym memorialynyń" aldyna jinaldy. Olar sýretshi Ashat Ahmediiarovtyń Qańtar oqiǵasyna arnalǵan “JAD” kórmesine qatysý úshin ár qaladan kelgen. Kórmege kelgen adamdar marqum týystaryn aqtaýdy, arnaiy mártebe berýdi talap etti. Buǵan qosa, Nazarbaevtyń atyna berilgen kóshelerdi Qańtar dep ózgertý qajettigin alǵa tartty, - dep habarlaidy Dalanews.kz "Azattyqqa" siltep.
Tarazdan kelgen Baqytjan Shyńǵysbekov "bekerden-beker sottalyp jatqan balalar aqtalsa eken" deidi.
"Keibir balalar aqtaldy. Al olardy atqandar nege jazaǵa tartylmaidy? Olar ana dúniede bolsa da jaýap beredi. Nege qarapaiym halyq qana jylap, qarapaiym halyq óle berýi kerek", - deidi Shyńǵysbekov.
Olar bilik tarapynan buryn kedegi bolǵanyn, qazir jinalýlaryna eshkim kedergi jasamaǵanyn aitty. Memorial mańynda politsiia da, bilik ókilderi de bolǵan joq.
"Qańtar eshqashan umtylmaidy. Balalarymyz terrorist emes. Bizdiń balalarymyz bilikke, úkimetke muńyn aitý úshin shyqqan bolatyn. Kileń jas balalar. Qanshama kóp balaly analar balalarynan, otbasyn asyraýshysynan aiyryldy. Balalarymyzǵa taǵylǵan aiypty alyp tastap, mártebe bersin dep talap etemiz. Qandy Qańtar kezinde qaza bolǵan balalarymyzǵa "Qaharman" mártebesi berilsin! Nazarbaev kóshesi Qańtar dep atalsyn! Balalarymyzdy atqan adamdar jazalansa deimiz", - dedi Qyzylordadan kelgen Bibigúl Alisheva.
1 mamyrda Almatyda 2022 jylǵy qandy Qańtar oqiǵasyna arnalǵan sýretshi Ashat Ahmediiarovtyń "JAD" kórmesi ashylǵan. On kúnge sozylatyn kórmege Qańtar oqiǵasyna qatysty 11 kompozitsiia qoiylǵan. Onyń ishinde qaraly oqiǵa kezinde túsirilgen fotolar, útik, politsiia taiaǵy, meditsina qyzmetkeriniń kiimi bar.
