Osydan birshama jyl buryn jýrnalist aǵalarymyz marqum Amanhan Álim men Samat Ibraimmen saparalas bolýdyń sáti túsken-di. Sol kezde toqsanynshy jyldardaǵy Joǵary keńestiń jumysy jaiynda biraz áńgime boldy.
Joǵary keńes jumys istegen jyldary biz oiyn balasy boldyq. Onyń jumysyn baǵa beretindei shamamyz bolǵan joq. Sondyqtan bilmeitin dúnielerimizdi Joǵary keńesten habar taratqan Samat aǵadan surap qalýǵa tyrystyq.
Aǵalarymyz sol jyldary ortalyq basylymdarda saiasi maqalalardy burqyratyp jazyp, saiasi oqiǵalardyń bel ortasynda júrgenin bilemiz.
Bizder sol kezde Joǵary keńestiń depýtattary Nazarbaevqa oiyn irkpei aityp, elimizde pikir alýandyǵyn qalyptastyrǵanynn emis-emis estip júrýshi edik.
Sol kezde Salyq Zimanov, Sultan Sartaev, Sherhan Murtaza, Asqar Jumadildaev syndy ult úshin janyn berýge daiar azamattardan Nazarbaev birshama seskengeni anyq.
Keiinnen Nazarbaev betke aityp, tóske shabatyn Joǵary keńesti Zamanbek Nurqadilovtiń kómegimen tarqatyp tyndy. Bul endi basqa áńgime.
Jolshybai saparlas bolǵan aǵalarym Joǵary keńes tarqamai, jumys istep turǵanda Nursultan Nazarbaev Joǵary keńeske kún qurǵatpai kelip, betke aitatyn depýtattarmen aitysyp, tartysyp jumys istegenin aitqanda birden sene almadyq.
«Shynymen de solai ma?» dep qaitalap suraǵanymyzda qos aǵamyz Joǵary keńestiń dálizinde Nazarbaevtyń kúnde kóretinderin aityp, tipti Úkimet múshelerin sol jerde ustap alyp, suraqtyń astyna alatynyn aitqan, tańqalyp qalǵanymdy jasyryp qaiteiin.
Nazarbaev dáýirinde esimiz kirgen bizder úshin aǵalardyń aitqan áńgimesi ertegidei estilýi zańdylyq qoi. Desek te toqsanynshy jyldary Joǵary keńes depýatattary Nazarbaevtyń tym erkinsýine jol bermedi.
Qazaqstanda pikir alýandyǵy, demokratiia degen dúnieler elimizde toqsanynshy jyldardyń basynda oraǵany anyq. Biraq biligin nyǵaitýdy kózdegen Nurekeń onyń bárin talqandap, qurtty.
Nazarbaev Joǵary keńesti tarqatyp, jańa Parlament qurǵannan keiin zań shyǵarýshy organǵa kúndelikti kelýin doǵarǵan. Baiqaǵan shyǵarsyzdar, Prezidentke qarsy kelip, bir aýyz sóz aita almaityn mojantopai depýtattardyń alǵashqy legi sol kezde paida boldy.
Ne aitsa da «láppai taqsyr» dep turǵan Parlamentke baryp, ýaqyt joǵaltýdyń maǵanasyz áreket ekenin Nazarbaev sol kezde jaqsy túsinsek kerek.
Osylaisha Joǵary keńes tarqaǵan soń, zań shyǵarýshy organdaǵy aitys pen tartys pyshaq keskendei tiylǵan.
Zań shyǵarýshy organnyń 90 paiyzy ózindik pikiri joq, jaltaq, jaǵympaz depýtattardan quralǵannan keiin Nurekeń Parlamentke kúzde sessiiasyny asharda jáne kóktemde sessiianyń jabarda ǵana tóbe kórsetetin boldy.
Nazarbaev turmaq Úkimet basshysynyń ózi jylyna úsh-tórt ret bas suǵatyn dárejege jetti.
Osylaisha zań shyǵarýshy organnyń qadiri ketip, Parlament Nazarbaevqa oda aitatyn alańǵa ainalǵany jasyryn emes.
Osylaisha Baqytgúl Hamenova depýtat bolǵan kezeńde elimizdiń zań shyǵarýshy organy kisi tanymastai bolyp ózgerdi. Zimanovtardyń betke aitatyn ótkirligin halyq qalaýlylary jalǵastyra almady.
Osydan keiin el ishinde depýatat degen Prezidentke maqtaý-madaq aitatyn maman iesi degen uǵym qalyptasqandai boldy...
Batpandap kirgen osy dúnieler mysqyldap shyǵady. Ol úshin ýaqyt kerek. Sonymen qatar bárine ýaqyt sabaq bolatynyn umytpaiyq!
Nurlan JUMAHANOV
