وسىدان ءبىرشاما جىل بۇرىن جۋرناليست اعالارىمىز مارقۇم امانحان ءالىم مەن سامات يبرايممەن ساپارالاس بولۋدىڭ ءساتى تۇسكەن-دى. سول كەزدە توقسانىنشى جىلدارداعى جوعارى كەڭەستىڭ جۇمىسى جايىندا ءبىراز اڭگىمە بولدى.
جوعارى كەڭەس جۇمىس ىستەگەن جىلدارى ءبىز ويىن بالاسى بولدىق. ونىڭ جۇمىسىن باعا بەرەتىندەي شامامىز بولعان جوق. سوندىقتان بىلمەيتىن دۇنيەلەرىمىزدى جوعارى كەڭەستەن حابار تاراتقان سامات اعادان سۇراپ قالۋعا تىرىستىق.
اعالارىمىز سول جىلدارى ورتالىق باسىلىمداردا ساياسي ماقالالاردى بۇرقىراتىپ جازىپ، ساياسي وقيعالاردىڭ بەل ورتاسىندا جۇرگەنىن بىلەمىز.
بىزدەر سول كەزدە جوعارى كەڭەستىڭ دەپۋتاتتارى نازاربايەۆقا ويىن ىركپەي ايتىپ، ەلىمىزدە پىكىر الۋاندىعىن قالىپتاستىرعانىنن ەمىس-ەمىس ەستىپ ءجۇرۋشى ەدىك.
سول كەزدە سالىق زيمانوۆ، سۇلتان سارتايەۆ، شەرحان مۇرتازا، اسقار جۇمادىلدايەۆ سىندى ۇلت ءۇشىن جانىن بەرۋگە دايار ازاماتتاردان نازاربايەۆ ءبىرشاما سەسكەنگەنى انىق.
كەيىننەن نازاربايەۆ بەتكە ايتىپ، توسكە شاباتىن جوعارى كەڭەستى زامانبەك ءنۇرقادىلوۆتىڭ كومەگىمەن تارقاتىپ تىندى. بۇل ەندى باسقا اڭگىمە.
جولشىباي ساپارلاس بولعان اعالارىم جوعارى كەڭەس تارقاماي، جۇمىس ىستەپ تۇرعاندا نۇرسۇلتان نازاربايەۆ جوعارى كەڭەسكە كۇن قۇرعاتپاي كەلىپ، بەتكە ايتاتىن دەپۋتاتتارمەن ايتىسىپ، تارتىسىپ جۇمىس ىستەگەنىن ايتقاندا بىردەن سەنە المادىق.
«شىنىمەن دە سولاي ما؟» دەپ قايتالاپ سۇراعانىمىزدا قوس اعامىز جوعارى كەڭەستىڭ دالىزىندە نازاربايەۆتىڭ كۇندە كورەتىندەرىن ايتىپ، ءتىپتى ۇكىمەت مۇشەلەرىن سول جەردە ۇستاپ الىپ، سۇراقتىڭ استىنا الاتىنىن ايتقان، تاڭقالىپ قالعانىمدى جاسىرىپ قايتەيىن.
نازاربايەۆ داۋىرىندە ەسىمىز كىرگەن بىزدەر ءۇشىن اعالاردىڭ ايتقان اڭگىمەسى ەرتەگىدەي ەستىلۋى زاڭدىلىق قوي. دەسەك تە توقسانىنشى جىلدارى جوعارى كەڭەس دەپۋاتاتتارى نازاربايەۆتىڭ تىم ەركىنسۋىنە جول بەرمەدى.
قازاقستاندا پىكىر الۋاندىعى، دەموكراتيا دەگەن دۇنيەلەر ەلىمىزدە توقسانىنشى جىلداردىڭ باسىندا وراعانى انىق. ءبىراق بيلىگىن نىعايتۋدى كوزدەگەن نۇرەكەڭ ونىڭ ءبارىن تالقانداپ، قۇرتتى.
نازاربايەۆ جوعارى كەڭەستى تارقاتىپ، جاڭا پارلامەنت قۇرعاننان كەيىن زاڭ شىعارۋشى ورگانعا كۇندەلىكتى كەلۋىن دوعارعان. بايقاعان شىعارسىزدار، پرەزيدەنتكە قارسى كەلىپ، ءبىر اۋىز ءسوز ايتا المايتىن موجانتوپاي دەپۋتاتتاردىڭ العاشقى لەگى سول كەزدە پايدا بولدى.
نە ايتسا دا «ءلاپپاي تاقسىر» دەپ تۇرعان پارلامەنتكە بارىپ، ۋاقىت جوعالتۋدىڭ ماعاناسىز ارەكەت ەكەنىن نازاربايەۆ سول كەزدە جاقسى تۇسىنسەك كەرەك.
وسىلايشا جوعارى كەڭەس تارقاعان سوڭ، زاڭ شىعارۋشى ورگانداعى ايتىس پەن تارتىس پىشاق كەسكەندەي تيىلعان.
زاڭ شىعارۋشى ورگاننىڭ 90 پايىزى وزىندىك پىكىرى جوق، جالتاق، جاعىمپاز دەپۋتاتتاردان قۇرالعاننان كەيىن نۇرەكەڭ پارلامەنتكە كۇزدە سەسسياسىنى اشاردا جانە كوكتەمدە سەسسيانىڭ جاباردا عانا توبە كورسەتەتىن بولدى.
نازاربايەۆ تۇرماق ۇكىمەت باسشىسىنىڭ ءوزى جىلىنا ءۇش-تورت رەت باس سۇعاتىن دارەجەگە جەتتى.
وسىلايشا زاڭ شىعارۋشى ورگاننىڭ ءقادىرى كەتىپ، پارلامەنت نازاربايەۆقا ودا ايتاتىن الاڭعا اينالعانى جاسىرىن ەمەس.
وسىلايشا باقىتگۇل حامەنوۆا دەپۋتات بولعان كەزەڭدە ەلىمىزدىڭ زاڭ شىعارۋشى ورگانى كىسى تانىماستاي بولىپ وزگەردى. زيمانوۆتاردىڭ بەتكە ايتاتىن وتكىرلىگىن حالىق قالاۋلىلارى جالعاستىرا المادى.
وسىدان كەيىن ەل ىشىندە دەپۋاتات دەگەن پرەزيدەنتكە ماقتاۋ-ماداق ايتاتىن مامان يەسى دەگەن ۇعىم قالىپتاسقانداي بولدى...
باتپانداپ كىرگەن وسى دۇنيەلەر مىسقىلداپ شىعادى. ول ءۇشىن ۋاقىت كەرەك. سونىمەن قاتار بارىنە ۋاقىت ساباق بولاتىنىن ۇمىتپايىق!
نۇرلان جۇماحانوۆ
