Qazaqstan halqy Assambleıasynyń Tóraǵasy Nursultan Nazarbaev Janseıit Túımebaevty qabyldady. Kezdesýde Nursultan Nazarbaevqa Qazaqstan halqy Assambleıasy men óńirlerdegi Dostyq úıleriniń qazirgi qyzmeti jaıly aqparat berildi.
"Elbasy Qazaqstandaǵy ázerbaıjan men armán dıasporalarynyń Taýly Qarabahtaǵy áskerı is-áreketterdi toqtatý jónindegi birlesken úndeýin qoldady. Qazaqstannyń Tuńǵysh Prezıdenti qaqtyǵystyń ýshyǵýyna alańdaýshylyq bildirip, Qazaqstan úshin dos memleketter arasynda kelissózderdi bastaýdyń mańyzdylyǵyn atap ótti. Bul óńirdegi jaǵdaıdy tezirek turaqtandyrýǵa septigin tıgizedi", delingen Elbasy saıtynda.
Qazaqstan halqy Assambleıasynyń tóraǵasy táýelsizdik alǵan kúnnen bastap halyqtyń birligi, qoǵamdaǵy turaqtylyq pen kelisim elimizdiń basty qundylyǵy bolǵanyn aıtty. Osy oraıda bıyl 25 jyldyǵyn atap ótip jatqan Qazaqstan halqy Assambleıasynyń aıryqsha róline toqtaldy.
Óz kezeginde Qazaqstan halqy Assambleıasy Tóraǵasynyń orynbasary J.Túımebaev Elbasyna etnosaralyq qatynastar salasyndaǵy memlekettik basqarýdy reformalaýdyń jáne taldaý jumystarynyń nátıjeleri týraly baıandady. Áleýmettik zertteýlerdiń sońǵy málimetterine sáıkes, Qazaqstan halqynyń 92,4 paıyzy etnosaralyq ahýaldy qolaıly jáne turaqty dep baǵalaǵan, al 89,2 paıyzy memlekettiń eldegi etnosaralyq kelisimdi saqtaý jónindegi is-áreketterin qoldap otyr.
Sonymen qatar Nursultan Nazarbaevqa Qazaqstan Respýblıkasy Konstıtýsıasy men Qazaqstan halqy Assambleıasynyń 25 jyldyǵyn uıymdastyrý jáne ótkizý jónindegi Ulttyq is-sharalar josparynyń iske asyrylýy, Qazaqstan halqy Assambleıasynyń 2025 jylǵa deıingi damý tujyrymdamasyn iske asyrý kezeńderi men pandemıa kezinde uıymdastyrylǵan qaıyrymdylyq jumystar týraly aqparat berildi.
Kezdesý sońynda Qazaqstan halqy Assambleıasynyń Tóraǵasy birqatar naqty tapsyrma berdi.
