Májilis depýtaty Qazybek Isa "QR tuńǵysh prezıdenti - Elbasy týraly" zańnyń alynyp tastaıtynyna qatysty kózqarasyn bildirdi. Eks-prezıdenttiń esimi Ata zańda atalmaıdy degen depýtat budan bylaı Nazarbaev pen elimizdiń kez-kelgen adamynyń quqyqtary birdeı bolatynyn aıtty, dep habarlaıdy Dalanews.kz.

Qazybek Isa jazbasynda buǵan deıin eldi shýlatqan "Nazarbaev Qazaqstannyń negizin salýshy" degen baǵa konstıtýsıaǵa jazylmaıtynyna toqtalǵan.

"QR tuńǵysh prezıdenti - Elbasy týraly" zańy da joıylady. QR prezıdenti Qasym-Jomart Toqaevtyń "Estıtin memleket" degeniniń taǵy bir dáleli osy bolsa kerek! Jańa Qazaq Eline jasalǵan taǵy bir basty qadam! Túbegeıli ózgeristiń, saıası reformanyń bastamasy!", - delingen depýtattyń Facebook áleýmettik jelidegi paraqshasynda.

Depýtat osy aptanyń basynda ótken "Aq jol" fraksıasy jıynynda bul másele talqylanǵanyn aıtady. Isanyń sózinshe, "Eger Nazarbaevtyń aty Ata zańǵa Qazaqstannyń negizin qalaýshy retinde jazylsa, onda ata tarıhymyzdaǵy Alash, Qazaq handyǵy, Altyn Orda, arydaǵy Túrik qaǵanaty qaıda qalady?" - degen másele kóterilgen.

"5 mamyrdaǵy parlament májilisiniń jalpy otyrysynda osy máselege núkte qoıylady.

Endi Nazarbaev pen elimizdiń kez kelgen adamynyń quqyqtary birdeı!

Iá, kádimgi damyǵan demokratıalyq elderdegideı barlyq adamdardyń qaqy teń! Ádiletti Qazaqstan degenge el senimi oıana bastady. Qosh bolyńyz, elbasy", - dep túıindedi Qazybek Isa.