Kósherbaev 20 mamyrda 63 jasqa tolady. Alaida prezidenttiń buiryǵyna sai óńir basshysynyń ókilettigi zeinetkerlik jasqa tolǵan kúnnen bastap 2021 jylǵy 20 mamyrdy qosa alǵandaǵy merzimge deiin uzartyldy. Nege? Buǵan ne sebep boldy?
Egemendik alǵan kúnnen beri Nazarbaevtyń janynan bir eli qalmai kele jatqan úzeńgilesi ári senimdi serigi – Qyrymbek Kósherbaev osy ýaqytqa deiin birtalai jaýapty qyzmettiń tizginin ustady. Barǵan jerinde júktelgen jumysqa asqan jaýapkershilikpen qarap, sózi men isi bir jerden shyqty. Sodan da shyǵar birneshe ret ákimder reitinginiń kóshin bastady Kósherbaev.
Onyń 2013 jyly Qyzylorda óńirine ákim bolyp taǵaiyndalýy da erekshe mánge ie, negizinde.
Bul týǵan jerge oralý edi. Uzaq jylǵa sozylǵan tabysty saiasi mansaptyń taǵy bir mańyzdy kezeńi týǵan jerge oralýmen túiindeldi.
Osy ýaqyttyń ishinde Kósherbaev Prezidenttiń baspasóz-hatshysy, Densaýlyq saqtaý, Bilim jáne mádeniet ministri (1997 jyldary bul baǵyttaǵy jumys bir vedomstvonyń moinynda bolatyn), Úkimetbasynyń orynbasary, Reseidegi, Finliandiiadaǵy, Armeniiadaǵy elshi jáne birneshe óńirdiń (Batys Qazaqstan oblysy, Mańǵystaý oblysy) ákimi qyzmetin atqaryp úlgergen-tuǵyn.
Kósherbaevtyń keńesshisi bolǵan Artur Nyǵmetovtyń aitýynsha, Qyrymbek Kósherbaev Memleket basshysy Nursultan Nazarbaevtyń adal shákirti ári senimdi serigi.
«Qyrymbek Eleýulynyń kásibi qarym-qabileti men jumysqa degen jaýapkershiligi ózgelerge úlgi bolarlyqtai. Onyń tabys kilti de osynda. Kósherbaev Prezidenttiń árbir tapsyrmasyn muqiiat tyńdap, tiianaqtap oryndaidy. Áleýmettik, ekonomikalyq jáne infraqurylymdyq máselelerge keshendi túrde kóńil bóledi. Bul baǵyttaǵy máselelerdi keshendi túrde sheshe biletin basshylardyń biri ol.
Qyrymbek Eleýulynyń mamandyǵy injener-qurylysshy. Osy sebepti de ol qurylys salasyn ekonomikalyq damýdyń diirmeni bola alaryn jaqsy túsinedi.
Sońǵy bes jylda Qyzylorda oblysynda óńirdiń órkendeýine serpin bergen aýqymdy jumystar atqaryldy. Oblystyń ekonomikalyq-áleýmettik kórsetkishteri jyl sanap jaqsaryp keledi. Munyń barlyǵy Qyrymbek Eleýulynyń qajyr-qairatynyń arqasynda múmkin boldy», – deidi Artur Nyǵmetov.
Aitýynsha, 2013 jyldan beri Qyzylorda oblysynda jalpy aýmaǵy eki million sharshy metrden asatyn turǵyn-úi qoldanysqa berilgen. Sonymen qatar osy ýaqyt aralyǵynda Qyzylordada 14 jańa shaǵynaýdan boi kóteripti.
Sońǵy bes jylda áleýmettik sala boiynsha 200-den asa nysan qoldanysqa berilgen eken. Al «Balapan» baǵdarlamasy belgilengen ýaqytynan erte oryndalǵan. Osylaisha apatty jaǵdaidaǵy mektepter men úsh aýysymda oqytý máselesi sheshimin taýypty.
Artur Nyǵmetov sonymen qatar óńir basshynyń jumys kestesin de aityp berdi.
«Qyrymbek Eleýuly táýligine 15 saǵat tapjylmai jumys isteidi. Tipti, demalystarda da tynym tapqanyn kórmeisiń. Ol zamanaýi trendterden de qalyspaidy. Kóp oqidy, kóp izdenedi. Ásirese Ilon Masktyń, Stiv Djobstyń tehnologiia týraly eńbekterine erekshe qyzyǵady. Máskeý akademiiasynyń professorlar quramymen tyǵyz bailanysta», – deidi ol.
Sonymen birge ol Qyzylorda oblysy ákiminiń ózine jáne qaramaǵyndaǵylarǵa erekshe talapshyl ekenin aitady.
«Basshy retinde qatal ári talapshyl. Alaida qataldyǵy eshqashan shekten shyqqan emes, ádiletti. Eń bastysy adamgershiligi mol. Adamdy, adam eńbegin baǵalai biledi. Bul Qyrymbek Eleýulynyń otbasynan alǵan tárbiesi, januia dástúri dep bilemin. Ol ideiashyl jastardy eshqashan betinen qaitarǵan emes. Kerisinshe, árdaiym qoldap, shyǵarmashylyq shabyt beredi. Oqimyn, oi-órisimdi, kásibi deńgeiimdi kótergim keledi degen talai jasqa qanat bitirdi. Kósherbaevpen birge istegen ýaqytta men tártip pen talaptyń arqasynda qandai nátijege jetýge bolatynyn túsindim» deidi ol.
Artur Nyǵmetov oblys ákiminiń fýtbolǵa qyzyǵýshylyǵy joǵary ekenin aitady. Kósherbaev jergilikti «Qaisar» fýtbol klýbynyń jankúieri. Súiikti komandasynyń bir de bir kezdesýin jibergen emes.
Eseli eńbektiń eskeriletini de anyq. Osy ýaqytqa deiingi ómirinde Kósherbaev kóptegen marapatqa ie boldy. Onyń ishindegi eń súbelileri «Parasat» jáne «Dostyq», II dárejeli «Barys» jáne "Qazaqstan Respýblikasynyń Tuńǵysh Prezidenti — Elbasy Nursultan Nazarbaev" ordenderi.
«Degenmen, Qyrymbek Eleýuly óziniń álýetin áli de bolsa tolyq tanyta alǵan joq» – deidi Artur Nyǵmetov. Onyń el damýyna qosar úlesi áli de mol.
Aitýynsha, Memleket basshysynyń Qyrymbek Kósherbaevtyń ókilettiligin uzartqanynyń bir sebebi de sonda.
«Mundai sheshimdi prezident Ádilbek Jaqsybekov, Berdibek Saparbaev, Danial Ahmetov jáne Amandyq Batalovqa qatysty da qabyldaǵan bolatyn. Demek Nazarbaev bulardyń eńbegin laiyqty baǵalaidy jáne olardyń elge bereri áli de kóp ekenine senedi degen sóz. Olar áli de tyń. Olardyń kásibi múmkindigi men álýeti áli de joǵary», – deidi Nyǵmetov.
