كوشەربايەۆ 20 مامىردا 63 جاسقا تولادى. الايدا پرەزيدەنتتىڭ بۇيرىعىنا ساي ءوڭىر باسشىسىنىڭ وكىلەتتىگى زەينەتكەرلىك جاسقا تولعان كۇننەن باستاپ 2021 جىلعى 20 مامىردى قوسا العانداعى مەرزىمگە دەيىن ۇزارتىلدى. نەگە؟ بۇعان نە سەبەپ بولدى؟
ەگەمەندىك العان كۇننەن بەرى نازاربايەۆتىڭ جانىنان ءبىر ەلى قالماي كەلە جاتقان ۇزەڭگىلەسى ءارى سەنىمدى سەرىگى – قىرىمبەك كوشەربايەۆ وسى ۋاقىتقا دەيىن ءبىرتالاي جاۋاپتى قىزمەتتىڭ تىزگىنىن ۇستادى. بارعان جەرىندە جۇكتەلگەن جۇمىسقا اسقان جاۋاپكەرشىلىكپەن قاراپ، ءسوزى مەن ءىسى ءبىر جەردەن شىقتى. سودان دا شىعار بىرنەشە رەت اكىمدەر رەيتينگىنىڭ كوشىن باستادى كوشەربايەۆ.
ونىڭ 2013 جىلى قىزىلوردا وڭىرىنە اكىم بولىپ تاعايىندالۋى دا ەرەكشە مانگە يە، نەگىزىندە.
بۇل تۋعان جەرگە ورالۋ ەدى. ۇزاق جىلعا سوزىلعان تابىستى ساياسي مانساپتىڭ تاعى ءبىر ماڭىزدى كەزەڭى تۋعان جەرگە ورالۋمەن تۇيىندەلدى.
وسى ۋاقىتتىڭ ىشىندە كوشەربايەۆ پرەزيدەنتتىڭ ءباسپاسوز-حاتشىسى، دەنساۋلىق ساقتاۋ، ءبىلىم جانە مادەنيەت ءمينيسترى (1997 جىلدارى بۇل باعىتتاعى جۇمىس ءبىر ۆەدومستۆونىڭ موينىندا بولاتىن)، ۇكىمەتباسىنىڭ ورىنباسارى، رەسەيدەگى، فينلياندياداعى، ارمەنياداعى ەلشى جانە بىرنەشە ءوڭىردىڭ (باتىس قازاقستان وبلىسى، ماڭعىستاۋ وبلىسى) اكىمى قىزمەتىن اتقارىپ ۇلگەرگەن-تۇعىن.
كوشەربايەۆتىڭ كەڭەسشىسى بولعان ارتۇر نىعمەتوۆتىڭ ايتۋىنشا، قىرىمبەك كوشەربايەۆ مەملەكەت باسشىسى نۇرسۇلتان نازاربايەۆتىڭ ادال شاكىرتى ءارى سەنىمدى سەرىگى.
«قىرىمبەك ەلەۋ ۇلىنىڭ كاسىبي قارىم-قابىلەتى مەن جۇمىسقا دەگەن جاۋاپكەرشىلىگى وزگەلەرگە ۇلگى بولارلىقتاي. ونىڭ تابىس كىلتى دە وسىندا. كوشەربايەۆ پرەزيدەنتتىڭ ءاربىر تاپسىرماسىن مۇقيات تىڭداپ، تياناقتاپ ورىندايدى. الەۋمەتتىك، ەكونوميكالىق جانە ينفراقۇرىلىمدىق ماسەلەلەرگە كەشەندى تۇردە كوڭىل بولەدى. بۇل باعىتتاعى ماسەلەلەردى كەشەندى تۇردە شەشە بىلەتىن باسشىلاردىڭ ءبىرى ول.
قىرىمبەك ەلەۋ ۇلىنىڭ ماماندىعى ينجەنەر-قۇرىلىسشى. وسى سەبەپتى دە ول قۇرىلىس سالاسىن ەكونوميكالىق دامۋدىڭ ديىرمەنى بولا الارىن جاقسى تۇسىنەدى.
سوڭعى بەس جىلدا قىزىلوردا وبلىسىندا ءوڭىردىڭ وركەندەۋىنە سەرپىن بەرگەن اۋقىمدى جۇمىستار اتقارىلدى. وبلىستىڭ ەكونوميكالىق-الەۋمەتتىك كورسەتكىشتەرى جىل ساناپ جاقسارىپ كەلەدى. مۇنىڭ بارلىعى قىرىمبەك ەلەۋ ۇلىنىڭ قاجىر-قايراتىنىڭ ارقاسىندا مۇمكىن بولدى»، – دەيدى ارتۇر نىعمەتوۆ.
ايتۋىنشا، 2013 جىلدان بەرى قىزىلوردا وبلىسىندا جالپى اۋماعى ەكى ميلليون شارشى مەتردەن اساتىن ءتۇرعىن-ۇي قولدانىسقا بەرىلگەن. سونىمەن قاتار وسى ۋاقىت ارالىعىندا قىزىلوردادا 14 جاڭا شاعىناۋدان بوي كوتەرىپتى.
سوڭعى بەس جىلدا الەۋمەتتىك سالا بويىنشا 200-دەن اسا نىسان قولدانىسقا بەرىلگەن ەكەن. ال «بالاپان» باعدارلاماسى بەلگىلەنگەن ۋاقىتىنان ەرتە ورىندالعان. وسىلايشا اپاتتى جاعدايداعى مەكتەپتەر مەن ءۇش اۋىسىمدا وقىتۋ ماسەلەسى شەشىمىن تاۋىپتى.
ارتۇر نىعمەتوۆ سونىمەن قاتار ءوڭىر باسشىنىڭ جۇمىس كەستەسىن دە ايتىپ بەردى.
«قىرىمبەك ەلەۋ ۇلى تاۋلىگىنە 15 ساعات تاپجىلماي جۇمىس ىستەيدى. ءتىپتى، دەمالىستاردا دا تىنىم تاپقانىن كورمەيسىڭ. ول زاماناۋي ترەندتەردەن دە قالىسپايدى. كوپ وقيدى، كوپ ىزدەنەدى. اسىرەسە يلون ماسكتىڭ، ستيۆ دجوبستىڭ تەحنولوگيا تۋرالى ەڭبەكتەرىنە ەرەكشە قىزىعادى. ماسكەۋ اكادەمياسىنىڭ پروفەسسورلار قۇرامىمەن تىعىز بايلانىستا»، – دەيدى ول.
سونىمەن بىرگە ول قىزىلوردا وبلىسى اكىمىنىڭ وزىنە جانە قاراماعىنداعىلارعا ەرەكشە تالاپشىل ەكەنىن ايتادى.
«باسشى رەتىندە قاتال ءارى تالاپشىل. الايدا قاتالدىعى ەشقاشان شەكتەن شىققان ەمەس، ادىلەتتى. ەڭ باستىسى ادامگەرشىلىگى مول. ادامدى، ادام ەڭبەگىن باعالاي بىلەدى. بۇل قىرىمبەك ەلەۋ ۇلىنىڭ وتباسىنان العان تاربيەسى، جانۇيا ءداستۇرى دەپ بىلەمىن. ول يدەياشىل جاستاردى ەشقاشان بەتىنەن قايتارعان ەمەس. كەرىسىنشە، ءاردايىم قولداپ، شىعارماشىلىق شابىت بەرەدى. وقيمىن، ءوي-ورىسىمدى، كاسىبي دەڭگەيىمدى كوتەرگىم كەلەدى دەگەن تالاي جاسقا قانات ءبىتىردى. كوشەربايەۆپەن بىرگە ىستەگەن ۋاقىتتا مەن ءتارتىپ پەن تالاپتىڭ ارقاسىندا قانداي ناتيجەگە جەتۋگە بولاتىنىن ءتۇسىندىم» دەيدى ول.
ارتۇر نىعمەتوۆ وبلىس اكىمىنىڭ فۋتبولعا قىزىعۋشىلىعى جوعارى ەكەنىن ايتادى. كوشەربايەۆ جەرگىلىكتى «قايسار» فۋتبول كلۋبىنىڭ جانكۇيەرى. سۇيىكتى كومانداسىنىڭ ءبىر دە ءبىر كەزدەسۋىن جىبەرگەن ەمەس.
ەسەلى ەڭبەكتىڭ ەسكەرىلەتىنى دە انىق. وسى ۋاقىتقا دەيىنگى ومىرىندە كوشەربايەۆ كوپتەگەن ماراپاتقا يە بولدى. ونىڭ ىشىندەگى ەڭ سۇبەلىلەرى «پاراسات» جانە «دوستىق»، ءىى دارەجەلى «بارىس» جانە "قازاقستان رەسپۋبليكاسىنىڭ تۇڭعىش پرەزيدەنتى — ەلباسى نۇرسۇلتان نازاربايەۆ" وردەندەرى.
«دەگەنمەن، قىرىمبەك ەلەۋ ۇلى ءوزىنىڭ الۋەتىن ءالى دە بولسا تولىق تانىتا العان جوق» – دەيدى ارتۇر نىعمەتوۆ. ونىڭ ەل دامۋىنا قوسار ۇلەسى ءالى دە مول.
ايتۋىنشا، مەملەكەت باسشىسىنىڭ قىرىمبەك كوشەربايەۆتىڭ وكىلەتتىلىگىن ۇزارتقانىنىڭ ءبىر سەبەبى دە سوندا.
«مۇنداي شەشىمدى پرەزيدەنت ادىلبەك جاقسىبەكوۆ، بەردىبەك ساپاربايەۆ، دانيال احمەتوۆ جانە اماندىق باتالوۆقا قاتىستى دا قابىلداعان بولاتىن. دەمەك نازاربايەۆ بۇلاردىڭ ەڭبەگىن لايىقتى باعالايدى جانە ولاردىڭ ەلگە بەرەرى ءالى دە كوپ ەكەنىنە سەنەدى دەگەن ءسوز. ولار ءالى دە تىڭ. ولاردىڭ كاسىبي مۇمكىندىگى مەن الۋەتى ءالى دە جوعارى»، – دەيدى نىعمەتوۆ.
