Nursultan Nazarbaev qaiǵyly oqiǵaǵa bailanysty kóńil aitty, dep habarlaidy dalanews.kz.
"Nursultan Nazarbaev Mańǵystaý oblysyndaǵy áskeri oqý-jattyǵý kezinde Qarýly Kúshterdiń áskeri qyzmetshileri qaza bolǵany týraly habardy zor kúizelispen qabyldady. Tuńǵysh Prezident orny tolmas qaiǵyǵa ortaqtasyp, marqumdardyń otbasy men jaqyndaryna kóńil aitty", - dep jazylǵan habarlamada.
Aita keteiik, premer-ministrdiń orynbasary Qanat Bozymbaev bastaǵan úkimettik komissiia Mańǵystaý oblysynda tótenshe jaǵdai bolǵan jerde jumys istep jatyr.
Naqtylanǵan málimetke sáikes oqý-jattyǵý, jaýyngerlik tapsyrmany oryndaý kezinde aýa raiy kúrt nasharlap, jel kúsheiýine bailanysty 17 adam sýǵa ketken. Onyń 12-si qaza taýyp, úsh áskeri qyzmetshi qutqaryldy. Qalǵan eki áskeri qyzmetshini izdestirý jumystary jalǵasyp jatyr.
