Qazaqstannyń Mádeniet jáne aqparat ministrligi “Astana Opera” teatrynyń qamqorshylyq keńesiniń quramyn ne úshin ózgertý týraly sheshim qabyldaǵanyn túsindirdi, dep habarlaidy Dalanews.kz Informburo.kz saityna siltep.
14 naýryzda “Ashyq NQA” portalynda jariialanǵan qaýly jobasyna sáikes, qamqorshylyq keńesten Dariǵa Nazarbaeva, Timýr Qulybaev, Keńes Raqyshev, Nurlan Smaǵulov, Almasadam Sátqaliev, Aleksandr Mashkevich (ol kezde kásipker tiri bolǵan) jáne Patoh Shodievti shyǵarý usynyldy. Olardyń ornyna Baharidin Ablazimov, Raiymbek Batalov, Nurlan Jaqypov, Shýhrat Ibragimov jáne Seger Haiting kirýi múmkin.
Mádeniet jáne aqparat ministrligi Informburo.kz saitynyń resmi saýalyna bergen jaýabynda teatrdyń qamqorshylyq keńesi keńesshi organ ekenin jáne onyń sheshimderi usynys retinde qarastyrylatynyn aitty.
“Keńestiń basty mindeti – teatrdyń qalyptasýy men damýyna qoldaý kórsetý: biýdjetten tys qarjy kózderin tartý, shyǵarmashylyq josparlardy júzege asyrýǵa kómektesý, kásibi sheberlikti arttyrý úshin jaǵdai jasaý, halyqaralyq jobalardy iske asyrýǵa járdemdesý, qyzmetkerlerge áleýmettik qoldaý kórsetý jáne basqarý júiesin jetildirýge yqpal etý”, – dep túsindirdi ministrlik.
Aita keteiik, “Astana Opera” basshylyǵynda da ózgerister boldy. 11 naýryzda teatrdyń jańa direktory bolyp Aleksandr Sovostianov taǵaiyndaldy. Ministrlik kadrlyq ózgeristerdiń áli de jalǵasýy múmkin ekenin joqqa shyǵarmaidy. Sondai-aq, teatrdyń qarjylyq turaqtylyǵyn saqtaý úshin bilet baǵasyna túzetýler engizilýi múmkin.
