Eski Qazaqstanda joǵary shendi sheneýnikterge qyzmet etip júrgen mýzykalyq prodiýser jáne kontsert uiymdastyrýshysy Rýslan Abdýsalamov jalǵan shot-faktýralardy jazýmen ainalysqan qylmystyq top uiymdastyrdy degen kúdikke ilindi. Qazirgi tańda is boiynsha sot otyrysy aiaqtalýǵa jaqyn. Kelesi sot otyrysynda Abdýsalamov sońǵy sózin aitady. Al onyń anasy bul is boiynsha úkim baiaǵyda shyǵyp qoiǵan dep alańdap otyr, - dep habarlaidy Dalanews.kz Orda.kz-ke siltep.
Rýslan Abdýsalamov bir kezderi Bolat Nazarbaevtyń qyzy Gúlmira Nazarbaevamen birge jumys istep, reseilik ártister Morgenshtern jáne Kirkorovpen dos bolyp, Nazarbaev pen Pýtinge sheteldik ártisterdi tasyǵan.
Aiyptalýshy ártistiń qorǵaýshylary úkim áldeqashan shyǵyp qoidy dep, al protsess birjaqty ótti dep sanaidy. Abdýsalamovtyń tarapy sottyń oflain rejimde ótkenin suraǵanymen onyń ótinishi qanaǵattandyrylmai, protsess onlain rejimde ótken.
Sot otyrysynda qoǵamdyq qorǵaýshysy bolyp otyrǵan Abdýsalamovtyń anasy tergeý durys júrgizilmegenin, sotta kóptegen sáikessizdikter baryn, aiyptalýshy osy ýaqytqa deiin onyń qylmystyq isimen tolyq tanyspaǵanyn, onda aiaq asty jańa derekter men tomdar paida bolǵanyn aitady.
Abdýsalamovtyń advokaty Dana Rysqulbek te bul is boiynsha úkim áldeqashan shyǵyp qoidy dep kúdiktenip otyr.
Rýslannyń anasy balasy buǵan deiin eshkimnen qashpai, elde júrgenin, tipti Túrkiia men BAÁ-de kontsert uiymdastyryp júrgenin aitady.
Sottalýshynyń qorǵaýshylary oǵan Almatynyń Ekonomikalyq tergeý departamentinen 2022 jyldyń shildesinde qozǵalǵan qylmystyq is týraly eshteńe kelmegenin aitady. Abdýsalamovtyń ata-anasy Almatyda turady, onyń burynǵy áieli eki kishkentai balasymen de osynda. Biraq eshkim eshqandai habarlamalar men shaqyrý qaǵazyn almaǵan kórinedi.
Abdýsalamovtyń advokattarynyń aitýynsha, ádette quqyq qorǵaý organdary qylmystyq is týraly kúdiktini de, onyń týystaryn da habardar etýi kerek, biraq qandai da bir sebeptermen onyń qorǵaýyndaǵy azamattyń isinde bul oryndalmaǵan.
Rýslan Abdýsalamovqa qatysty kelesi sot otyrysynda prodiýserge úkim shyǵady dep boljanyp otyr.
