ەسكى قازاقستاندا جوعارى شەندى شەنەۋنىكتەرگە قىزمەت ەتىپ جۇرگەن مۋزىكالىق پروديۋسەر جانە كونسەرت ۇيىمداستىرۋشىسى رۋسلان ابدۋسالاموۆ جالعان شوت-فاكتۋرالاردى جازۋمەن اينالىسقان قىلمىستىق توپ ۇيىمداستىردى دەگەن كۇدىككە ءىلىندى. قازىرگى تاڭدا ءىس بويىنشا سوت وتىرىسى اياقتالۋعا جاقىن. كەلەسى سوت وتىرىسىندا ابدۋسالاموۆ سوڭعى ءسوزىن ايتادى. ال ونىڭ اناسى بۇل ءىس بويىنشا ۇكىم باياعىدا شىعىپ قويعان دەپ الاڭداپ وتىر، - دەپ حابارلايدى Dalanews.kz Orda.kz-كە سىلتەپ.
رۋسلان ابدۋسالاموۆ ءبىر كەزدەرى بولات نازاربايەۆتىڭ قىزى گۇلميرا نازاربايەۆامەن بىرگە جۇمىس ىستەپ، رەسەيلىك ارتىستەر مورگەنشتەرن جانە كيركوروۆپەن دوس بولىپ، نازاربايەۆ پەن پۋتينگە شەتەلدىك ارتىستەردى تاسىعان.
ايىپتالۋشى ءارتىستىڭ قورعاۋشىلارى ۇكىم الدەقاشان شىعىپ قويدى دەپ، ال پروسەسس ءبىرجاقتى ءوتتى دەپ سانايدى. ابدۋسالاموۆتىڭ تاراپى سوتتىڭ وفلاين رەجيمدە وتكەنىن سۇراعانىمەن ونىڭ ءوتىنىشى قاناعاتتاندىرىلماي، پروسەسس ونلاين رەجيمدە وتكەن.
سوت وتىرىسىندا قوعامدىق قورعاۋشىسى بولىپ وتىرعان ابدۋسالاموۆتىڭ اناسى تەرگەۋ دۇرىس جۇرگىزىلمەگەنىن، سوتتا كوپتەگەن سايكەسسىزدىكتەر بارىن، ايىپتالۋشى وسى ۋاقىتقا دەيىن ونىڭ قىلمىستىق ىسىمەن تولىق تانىسپاعانىن، وندا اياق استى جاڭا دەرەكتەر مەن تومدار پايدا بولعانىن ايتادى.
ابدۋسالاموۆتىڭ ادۆوكاتى دانا رىسقۇلبەك تە بۇل ءىس بويىنشا ۇكىم الدەقاشان شىعىپ قويدى دەپ كۇدىكتەنىپ وتىر.
رۋسلاننىڭ اناسى بالاسى بۇعان دەيىن ەشكىمنەن قاشپاي، ەلدە جۇرگەنىن، ءتىپتى تۇركيا مەن باا-دە كونسەرت ۇيىمداستىرىپ جۇرگەنىن ايتادى.
سوتتالۋشىنىڭ قورعاۋشىلارى وعان الماتىنىڭ ەكونوميكالىق تەرگەۋ دەپارتامەنتىنەن 2022 جىلدىڭ شىلدەسىندە قوزعالعان قىلمىستىق ءىس تۋرالى ەشتەڭە كەلمەگەنىن ايتادى. ابدۋسالاموۆتىڭ اتا-اناسى الماتىدا تۇرادى، ونىڭ بۇرىنعى ايەلى ەكى كىشكەنتاي بالاسىمەن دە وسىندا. ءبىراق ەشكىم ەشقانداي حابارلامالار مەن شاقىرۋ قاعازىن الماعان كورىنەدى.
ابدۋسالاموۆتىڭ ادۆوكاتتارىنىڭ ايتۋىنشا، ادەتتە قۇقىق قورعاۋ ورگاندارى قىلمىستىق ءىس تۋرالى كۇدىكتىنى دە، ونىڭ تۋىستارىن دا حاباردار ەتۋى كەرەك، ءبىراق قانداي دا ءبىر سەبەپتەرمەن ونىڭ قورعاۋىنداعى ازاماتتىڭ ىسىندە بۇل ورىندالماعان.
رۋسلان ابدۋسالاموۆقا قاتىستى كەلەسى سوت وتىرىسىندا پروديۋسەرگە ۇكىم شىعادى دەپ بولجانىپ وتىر.
