Elbasy ınovasıalar men jańa tehnologıalardy engizý jónindegi jumystardy jalǵastyrý, sondaı-aq bul úrdiske «Qazaqstandaǵy 100 jańa esim» jobasyna qatysýshylardyń kreatıvti áleýetin paıdalaný qajet ekenin atap ótti.
Sonymen qatar, Nursultan Nazarbaev qazaq tilin latyn qarpine kóshirý máselesine toqtalyp, memlekettik tildiń mártebesin arttyrýǵa baǵyttalǵan sharalar qabyldaýdyń mańyzdylyǵyn aıtty.
– Halqymyz úshin latyn qarpine kóshý úderisiniń tarıhı máni zor. Sonymen birge, qazaq tiliniń mártebesin arttyrý jónindegi jumystardy jalǵastyrý qajet.
Parlament pen Úkimettiń qyzmeti memlekettik tilde júrgizilýge tıis.
Sondaı-aq, bul másele boıynsha azamattardyń quqyǵyn shekteýge bolmaıdy. Bul rette ilespe aýdarma jasaý múmkindigi bar, – dedi Qazaqstan Prezıdenti.
Memleket basshysy latyn qarpine kezeń-kezeńmen kóshýdiń mańyzdylyǵyn aıtyp, qazaq tilin úıretý ádistemelerin jetildirý máselelerin jan-jaqty zertteýdi tapsyrdy.
Budan bólek, Elbasy kıberqaýipsizdikti qamtamasyz etý jáne otandyq buqaralyq aqparat quraldarynyń básekege qabilettigin arttyrý máselelerine nazar aýdardy.
Nursultan Nazarbaev elimizdiń telearnalaryndaǵy serıalyq ónimderdiń sapasyn arttyrý qajettigine toqtalyp, mass-medıa jastarǵa patrıottyq tárbıe berý isinde mańyzdy ról atqaratynyn atap ótti.
Kezdesý barysynda Dáýren Abaev Qazaqstan Prezıdentine «Sıfrlyq Qazaqstan» baǵdarlamasyn iske asyrý jospary týraly baıandap, onyń basym baǵyttaryn túsindirýge baılanysty sharalar jóninde málimet berdi.
– Biz «Sıfrlyq Qazaqstan» memlekettik baǵdarlamasyn júzege asyrý jumystaryn jalǵastyrýdamyz. Jalpy, baǵdarlama aıasynda 120 birlesken is-shara kózdelgen, onyń jıyrmasy bıyl oryndalatyn bolady, – dedi Aqparat jáne komýnıkasıalar mınıstri.
Sondaı-aq, D.Abaev Nursultan Nazarbaevqa «Astana EKSPO-2017» kórme kesheni ınfraqurylymynyń bazasynda qurylǵan «Astana Hub» halyqaralyq tehnoparki jumysynyń bastalǵanyn málimdedi.
Kezdesý sońynda Memleket basshysy birqatar naqty tapsyrma berdi.
