Nazarbaev: "Naýryz túbinde bizdiń jańa jylymyzǵa ainalady"
"Qurmetti otandastar, kele jatqan kóktem men jaqsylyqtyń merekesi - Naýryz meiramy barsha qazaqstandyqtarǵa qutty bolsyn! Bul - uzyn qystan keiin, aiaz ben borannan keiin asyǵa kútetin merekemiz. Meniń Jarlyǵymmen, Naýryzdy úsh kún toilaityn bolamyz. Baǵzy zamannan kele jatqan mereke Táýelsizdikpen birge qaita oraldy. Mineki, Táýelsizdikti alǵaly beri osy Naýryzdy atap kele jatyrmyz. Túbinde bul bizdiń negizgi jańajyldyq merekemiz bolady. 1 qańtardy I Petr Batys Eýropadan alyp kelgen edi. Ony da toilaimyz. Biraq bizdiń negizgi merekemiz - kún men túnniń teńeletin, tabiǵattyń barlyǵy oianatyn kez", - dep atap ótti N.Nazarbaev "Jańarǵan jer, baq qonǵan nurly el" atty miýzikldi tamashalaǵannan keiin tilshilerge bergen suhbatynda.
Memleket basshysynyń aitýynsha, Táýelsizdik jyldary ishinde biraz sharýa atqaryldy. Bunyń barlyǵy xalyq birligi arqasynda iske asyp otyr.
Álemde bolyp jatqan ózgeristerge bailanysty jańarý, texnologiialyq damý, rýxani jańǵyrý jáne taǵy basqa baǵdarlamalar qolǵa alyndy. Bes áleýmettik bastama da qarapaiym xalyqtyń jaǵdaiyn jaqsartýǵa arnalǵan.
Sebebi onyń ishinde arzan ipoteka, jataqxana salý, tabysy az adamdardy salyqtan bosatý, gazdandyrý siiaqty mańyzdy máseleler bar. "Osy ýaqytqa deiin Qazaqstan álemge keńinen tanyldy. Eldiń birligi myqty bolǵandyqtan, memlekettiń abyroiy artyp keledi. Bolashaqta osyny ustanýymyz qajet. Sebebi eldiń birligi, bir judyryq bolyp jumylýy - bolashaq tabystarymyzdyń kózi bolyp sanalady", - dep atap kórsetti Prezident.
Buǵan deiin habarlaǵanymyzdai, búgin Elbasy Astanadaǵy Kongress ortalyǵynda Naýryz meiramyna arnalǵan "Jańarǵan jer, baq qonǵan nurly el" atty jańa miýzikldi tamashalady.
