Qoǵam qaıratkeri Ýálıhan Qaısarov “Ne mojet byt/Múmkin emes” YouTube arnasyna bergen suhbatynda 1986 jylǵy Jeltoqsan oqıǵasy kezinde Nursultan Nazarbaevtyń Mıhaıl Gorbachevtan Almatyǵa ásker jiberýdi ózi suraǵanyn aıtty, dep habarlaıdy Dalanews.kz.
Qaısarov óz málimdemesimen eks-prezıdenttiń Almatyǵa odaqtyq respýblıkalardan áskerler kelgenge qarsy boldym degen sózin joqqa shyǵarady.
“Baryp turǵan ótirik. Marqum Gorbachev bul jaǵdaıdy basqasha baıandap berdi: “Memlekettik qaýipsizdik komıteti maǵan Almatyda jastar alańǵa jınalatyny týraly habar berdi. Ázirge jaǵdaı túsiniksiz dedi”.
Nazarbaev Gorbachevke qońyraý shalyp: “Mıhaıl Sergeevıch, jaǵdaı ýshyǵýy múmkin, áskerlerdi ákelińiz” depti. Bul Gorbachevtiń sózderi, bul meniń sózderim emes”, - dedi Ýálıhan Qaısarov.
Onyń aıtýynsha, Nazarbaev Máskeýge birneshe ret qońyraý shaldy.
“Nazarbaev oǵan ekinshi ret habarlasty: “Mıhaıl Sergeevıch, munda dúkenderdi órtep, kólikterdi aýdaryp jatyr. Almatynyń bári otqa oranyp tur”. Gorbachev - Nazarbaevqa: “Nursultan, sende bári tynysh. Búlik shyǵarýdyń qajeti joq” depti. Ýaqyt óte kele Nazarbaev úshinshi ret qońyraý shaldy: "Rezıdensıamyzǵa, ortalyq partıa ǵımaratyna basyp kirdi. Biz qazir sham baǵanalaryna ilinetin bolamyz". Gorbachev MQK-ne habarlasyp, jaǵdaıdy suraǵanda, ásker kerek emes degen jaýap alady. Biraq Nazarbaev: "Áskerıler kelmese, jaýapkershilikten bas tartamyn" depti. Sodan keıin Gorbachev: "Almatylyq joldastar barlyq jaýapkershilikti óz moınyndaryna alady. Áskerdi jiberinder" dep buıryq berdi»” - deıdi Qaısarov.
Alaıda, Nursultan Nazarbaev óziniń estelikter kitabynda 86 jeltoqsanda bolǵan oqıǵany basqasha sıpattaıdy. Onyń aıtýynsha, ol odaqtas elderden kelgen desantty Qazaqstanǵa qondyrý týraly alańdap, oǵan qarsy shyqty.
“Men Nazarbaevqa eshqashan senbedim de qazir senbeımin. Allanyń aldynda ózi jaýap bersin”, - dep sózin qorytyndylady Ýálıhan Qaısarov.
