Qoǵam qairatkeri, burynǵy Májilis depýtaty Tólegen Qýanyshev Orda life baǵdarlamasyna bergen suhbatynda marqum saiasatker Marat Ospanov pen burynǵy Prezident Nursultan Nazarbaevpen araqatynasy týraly áńgimeledi, - dep habarlaidy Dalanews.kz.
Qýanyshevtiń pikirinshe, 51 jasynda kóz jumǵan Marat Ospanovtyń ólimine eks-prezidenttiń qatysy baryn dáleldeitindei eshqandai dáiek joq.
"Olai deýge árbir adamnyń qolynda dálel bolýy kerek. Sondyqtan da syrtynan ton pishkenimiz retsiz bolar. Meniń qolymda dálel joq. Dál solai boldy dep aita almaimyn.
Meditsinalyq qorytyndy bar ǵoi, sol jerde qan qysymynan dúnie saldy degen qorytyndysy bar. Biz sony negizge alamyz. Odan da jas azamattar ketip jatyr ǵoi. Men resmi qorytyndyny negizge alamyn", - dedi burynǵy sheneýnik.
Onyń sózinshe, Ospanov Nazarbaevtyń kózine birden túsken.
"Bul jerde (Nazarbaev pen Ospanovtyń qarym-qatynasyna - esk.) syrttai baǵa bere alamyz. Mákeńniń óziniń tulǵalyq minezi bar. Ol qaibir másele bolmasyn ishtei qorytyndylap, sony baiyptap, sodan keiin ǵana jaýap beretin. Til máselesine, shekara máselesine kelgen ýaqyttarda qatty toitarystar, sóz talastar bolǵan jerler de boldy. El múddesin qorǵai almaityndai jaǵdailar týyndaǵanda úzilis jariialap jiberip, qaǵazdardy, tájiribelerdi qarap, oqyp bilip, sodan keiin jaýap beretin edi. Sondai qasietimen kópke tanyldy.
El prezidentiniń de kóńilinen shyǵyp júrgen jaiyn baiqadyq", - dedi Qýanyshev.
Burynǵy depýtat Tólegen Qýanyshev Marat Ospanovtyń prezident sailaýyna túsýge qaýqary tolyq jetkenin aitty.
"Bolǵan shyǵar (Prezident bolýǵa ambitsiiasy - esk.). Qai-qai jaǵynan da daiyn jigit edi ǵoi.
Saiasi jaǵynan da, ekonomikalyq jaǵynan da, zań jaǵynan da. Halyqaralyq saiasatkerlerdiń arasynda da bedeli joǵary bolatyn.
Demokratiialyq turǵysynan Prezidenttik sailaý ótkizetin bolsa, dál sol mezgilderde qatysýy múmkin edi. Jeńý-jeńbeýi ekitalai.
Biraq ózin saiasatker retinde kórsetetindei qabileti bolatyn", - dedi ol.
Marat Ospanov Qazaqstan Parlamenti májilisiniń tuńǵysh tóraǵasy qyzmetin atqarǵan. 1999-2000 jyldary "Otan" partiiasy tóraǵasynyń orynbasary, 1995-2005 jyldary 1 jáne 2-shaqyrylymdaǵy QR Parlamenti Májilisiniń depýtaty bolǵan. Qoǵam qairatkeri 2000 jyldyń basynda nebári 51 jasynda Almatyda kóz jumǵan.
