قوعام قايراتكەرى، بۇرىنعى ءماجىلىس دەپۋتاتى تولەگەن قۋانىشيەۆ Orda life باعدارلاماسىنا بەرگەن سۇحباتىندا مارقۇم ساياساتكەر مارات وسپانوۆ پەن بۇرىنعى پرەزيدەنت نۇرسۇلتان نازاربايەۆپەن اراقاتىناسى تۋرالى اڭگىمەلەدى، - دەپ حابارلايدى Dalanews.kz.
قۋانىشيەۆتىڭ پىكىرىنشە، 51 جاسىندا كوز جۇمعان مارات وسپانوۆتىڭ ولىمىنە ەكس-پرەزيدەنتتىڭ قاتىسى بارىن دالەلدەيتىندەي ەشقانداي دايەك جوق.
"ولاي دەۋگە ءاربىر ادامنىڭ قولىندا دالەل بولۋى كەرەك. سوندىقتان دا سىرتىنان تون پىشكەنىمىز رەتسىز بولار. مەنىڭ قولىمدا دالەل جوق. ءدال سولاي بولدى دەپ ايتا المايمىن.
مەديسينالىق قورىتىندى بار عوي، سول جەردە قان قىسىمىنان دۇنيە سالدى دەگەن قورىتىندىسى بار. ءبىز سونى نەگىزگە الامىز. ودان دا جاس ازاماتتار كەتىپ جاتىر عوي. مەن رەسمي قورىتىندىنى نەگىزگە الامىن"، - دەدى بۇرىنعى شەنەۋنىك.
ونىڭ سوزىنشە، وسپانوۆ نازاربايەۆتىڭ كوزىنە بىردەن تۇسكەن.
"بۇل جەردە (نازاربايەۆ پەن وسپانوۆتىڭ قارىم-قاتىناسىنا - ەسك.) سىرتتاي باعا بەرە الامىز. ماكەڭنىڭ ءوزىنىڭ تۇلعالىق مىنەزى بار. ول ءقايبىر ماسەلە بولماسىن ىشتەي قورىتىندىلاپ، سونى بايىپتاپ، سودان كەيىن عانا جاۋاپ بەرەتىن. ءتىل ماسەلەسىنە، شەكارا ماسەلەسىنە كەلگەن ۋاقىتتاردا قاتتى تويتارىستار، ءسوز تالاستار بولعان جەرلەر دە بولدى. ەل مۇددەسىن قورعاي المايتىنداي جاعدايلار تۋىنداعاندا ءۇزىلىس جاريالاپ جىبەرىپ، قاعازداردى، تاجىريبەلەردى قاراپ، وقىپ ءبىلىپ، سودان كەيىن جاۋاپ بەرەتىن ەدى. سونداي قاسيەتىمەن كوپكە تانىلدى.
ەل پرەزيدەنتىنىڭ دە كوڭىلىنەن شىعىپ جۇرگەن جايىن بايقادىق"، - دەدى قۋانىشيەۆ.
بۇرىنعى دەپۋتات تولەگەن قۋانىشيەۆ مارات وسپانوۆتىڭ پرەزيدەنت سايلاۋىنا تۇسۋگە قاۋقارى تولىق جەتكەنىن ايتتى.
"بولعان شىعار (پرەزيدەنت بولۋعا امبيسياسى - ەسك.). قاي-قاي جاعىنان دا دايىن جىگىت ەدى عوي.
ساياسي جاعىنان دا، ەكونوميكالىق جاعىنان دا، زاڭ جاعىنان دا. حالىقارالىق ساياساتكەرلەردىڭ اراسىندا دا بەدەلى جوعارى بولاتىن.
دەموكراتيالىق تۇرعىسىنان پرەزيدەنتتىك سايلاۋ وتكىزەتىن بولسا، ءدال سول مەزگىلدەردە قاتىسۋى مۇمكىن ەدى. جەڭۋ-جەڭبەۋى ەكىتالاي.
ءبىراق ءوزىن ساياساتكەر رەتىندە كورسەتەتىندەي قابىلەتى بولاتىن"، - دەدى ول.
مارات وسپانوۆ قازاقستان پارلامەنتى ءماجىلىسىنىڭ تۇڭعىش ءتوراعاسى قىزمەتىن اتقارعان. 1999-2000 جىلدارى "وتان" پارتياسى ءتوراعاسىنىڭ ورىنباسارى، 1995-2005 جىلدارى 1 جانە 2-شاقىرىلىمداعى ق ر پارلامەنتى ءماجىلىسىنىڭ دەپۋتاتى بولعان. قوعام قايراتكەرى 2000 جىلدىڭ باسىندا نەبارى 51 جاسىندا الماتىدا كوز جۇمعان.
