«Búgin «Qazaqstan Respýblıkasynyń Ákimshilik-aýmaqtyq qurylys týraly» Zańynyń toǵyzynshy babyna sáıkes, Shymkent qalasyna respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵaly otyrmyn.
Budan bylaı bul óńir Túrkistan oblysy dep atalatyn bolady.
Osy ákimshilik aýmaqtyń qurylymyna ózgeris engizý arqyly bul óńirdiń órkendeýine tyń serpin berýdi kózdegen tarıhı qujat bolyp sanalady», - dep atap ótti Memleket basshysy.
Osy oraıda Elbasy Ońtústik Qazaqstan elimizdegi ekonomıkalyq, kólik-logıstıkalyq, demografıalyq áleýeti zor aımaq ekenin, bıyl halqynyń sany mıllıonǵa jetken Shymkent shahary Qazaqstandaǵy eń iri megapolıstiń qataryna qosylǵanyn eske salyp ótti.
Atap aıtqanda, Táýelsizdik jyldarynda Astanadan keıin Shymkent mıllıonnan asa halqy bar qala retinde tirkeldi.
«Mynda oblystaǵy ónerkásip óndirisiniń 60 paıyzy Shymkentte shoǵyrlanǵan.
Shahar elimizdegi jetekshi saýda-ónerkásip jáne mádenıet oshaqtarynyń biri bolyp sanalatynyn bilemiz. Qalanyń osyndaı múmkindikterin eskerip, oǵan respýblıkalyq mártebe berý jóninde sheshim qabyldadym. Al oblys ortalyǵy Túrkistan qalasyna kóshiriledi», - dedi Nursultan Nazarbaev.
[video width="1280" height="720" mp4="https://dalanews.kz/wp-content/uploads/2018/06/10000000_459670951156796_4855736913568464896_n.mp4"][/video]
