Qazaqstannyń burynǵy prezidenti Nursultan Nazarbaev Qazaqstan Ǵylym akademiiasynyń akademigi mártebesinen aiyryldy. Bul týraly búgin ótken brifingide Ǵylym jáne joǵary bilim ministri Saiasat Nurbek aitty, - dep habarlaidy Dalanews.kz Massaget.kz-ke siltep.
Ǵylym jáne joǵary bilim ministri akademik mártebesin berý boiynsha ózgerister týraly aitty. Onyń aitýynsha, qazir Qazaqstan Ǵylym akademiiasy "qaita retke keltirý" kezeńinen ótip jatyr.
"Qazir bizde RPO (Respýblikalyq qoǵamdyq birlestigi) jumys istep jatyr. Byltyr Prezident sheshimimen jańadan Ǵylym akademiiasy quryldy. Ol birinshiden, Prezident janynda, memleket tarapynan qarjylandyrylady", - dedi ministr onlain brifingide.
Vedomstvo basshysynyń aitýynsha, kóp akademiktiń mártebesi joiyldy.
"Ǵylym akademiiasyna birte-birte myqty ǵalymdardy jinaimyz. Buryn akademiiada bolǵan adamdardyń statýsy joiyldy. Jańadan sailanǵan akademikter - óte myqty, moiyndalǵan ǵalymdar. Olar Qazaq neirohirýrgiia qaýymdastyǵynyń prezidenti Serik Aqsholaqov, Qazaqstandaǵy reprodýktologiianyń negizin salýshylardyń bir Viacheslav Lokshii, Nazarbaev ýniversitetiniń professory Dýrvýdhan Sýragan, Iadrolyq fizika institýtynyń jetekshisi Maksim Zdorovets, ál-Farabi atyndaǵy Qazaq ulttyq ýniversitetiniń professory, ataqty fizik Tilekqabyl Ramazanov", - dedi ministr.
"Burynǵy prezident Nursultan Nazarbaev endi Ǵylym akademiiasynyń múshesi emes pe?" dep surady jýrnalister ministrden.
"Dál solai, qazir Ulttyq ǵylym akademiiasynda nebári 9 múshesi bar, tizimdi beremiz", - dedi Saiasat Nurbek.
Ashyq aqparat kózderinen alynǵan málimetke qaraǵanda, Qazaqstan Ǵylym akademiiasynyń akademigi mártebesi Nazarbaevqa 1995 jyly berilgen. Al 2011 jyly Akademiia ǵimaratynda Nazarbaevtyń qatysýymen ǵalymdar forýmy ótip, oǵan "Ǵasyr ǵalymy" ataǵy berildi.
