قازاقستاننىڭ بۇرىنعى پرەزيدەنتى نۇرسۇلتان نازاربايەۆ قازاقستان عىلىم اكادەمياسىنىڭ اكادەميگى مارتەبەسىنەن ايىرىلدى. بۇل تۋرالى بۇگىن وتكەن بريفينگىدە عىلىم جانە جوعارى ءبىلىم ءمينيسترى ساياسات نۇربەك ايتتى، - دەپ حابارلايدى Dalanews.kz Massaget.kz-كە سىلتەپ.
عىلىم جانە جوعارى ءبىلىم ءمينيسترى اكادەميك مارتەبەسىن بەرۋ بويىنشا وزگەرىستەر تۋرالى ايتتى. ونىڭ ايتۋىنشا، ءقازىر قازاقستان عىلىم اكادەمياسى "قايتا رەتكە كەلتىرۋ" كەزەڭىنەن ءوتىپ جاتىر.
"ءقازىر بىزدە رپو (رەسپۋبليكالىق قوعامدىق بىرلەستىگى) جۇمىس ىستەپ جاتىر. بىلتىر پرەزيدەنت شەشىمىمەن جاڭادان عىلىم اكادەمياسى قۇرىلدى. ول بىرىنشىدەن، پرەزيدەنت جانىندا، مەملەكەت تاراپىنان قارجىلاندىرىلادى"، - دەدى مينيستر ونلاين بريفينگىدە.
ۆەدومستۆو باسشىسىنىڭ ايتۋىنشا، كوپ اكادەميكتىڭ مارتەبەسى جويىلدى.
"عىلىم اكادەمياسىنا بىرتە-بىرتە مىقتى عالىمداردى جينايمىز. بۇرىن اكادەميادا بولعان ادامداردىڭ ستاتۋسى جويىلدى. جاڭادان سايلانعان اكادەميكتەر - وتە مىقتى، مويىندالعان عالىمدار. ولار قازاق نەيروحيرۋرگيا قاۋىمداستىعىنىڭ پرەزيدەنتى سەرىك اقشولاقوۆ، قازاقستانداعى رەپرودۋكتولوگيانىڭ نەگىزىن سالۋشىلاردىڭ ءبىر ۆياچەسلاۆ لوكشيى، نازاربايەۆ ۋنيۆەرسيتەتىنىڭ پروفەسسورى دۋرۆۋدحان سۋراگان، يادرولىق فيزيكا ينستيتۋتىنىڭ جەتەكشىسى ماكسيم زدوروۆەس، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى، اتاقتى فيزيك تىلەكقابىل رامازانوۆ"، - دەدى مينيستر.
"بۇرىنعى پرەزيدەنت نۇرسۇلتان نازاربايەۆ ەندى عىلىم اكادەمياسىنىڭ مۇشەسى ەمەس پە؟" دەپ سۇرادى جۋرناليستەر مينيستردەن.
"ءدال سولاي، ءقازىر ۇلتتىق عىلىم اكادەمياسىندا نەبارى 9 مۇشەسى بار، ءتىزىمدى بەرەمىز"، - دەدى ساياسات نۇربەك.
اشىق اقپارات كوزدەرىنەن الىنعان مالىمەتكە قاراعاندا، قازاقستان عىلىم اكادەمياسىنىڭ اكادەميگى مارتەبەسى نازاربايەۆقا 1995 جىلى بەرىلگەن. ال 2011 جىلى اكادەميا عيماراتىندا نازاربايەۆتىڭ قاتىسۋىمەن عالىمدار فورۋمى ءوتىپ، وعان "عاسىر عالىمى" اتاعى بەرىلدى.
