Prezident úkimettiń keńeitilgen otyrysynda investitsiialar jáne damý ministrliginiń jumysyn synǵa aldy.
Astanada ótip jatqan úkimettiń keńeitilgen otyrysynda prezident Nursultan Nazarbaev investitsiialar jáne damý ministri Jeńis Qasymbektiń jumysyn synady.
Prezident otyrysta "Nurly jol" memlekettik baǵdarlamasyna toqtalyp, joldardyń sapasy men aqshanyń tiimdi jumsalýy problema bolyp otyrǵanyn aitty.
"Qazir salynyp jatqan jol óskeleń urpaqtyń igiline jumys isteidi. Biraq qazir basty másele – joldardyń sapasy men ashyqtyq, tiimdilik bolyp otyr. Búginde osyndai bassyzdyqtardan quqyq qorǵaý organdary "Qazaqavtojoldyń", óńirlik filialdarynyń barlyq derlik basshylyǵyn ustady. Árine, bir nárse búldirgeni úshin. Bul basshylyqtyń aqshany paidalanýynda da, joldardyń sapasynda da kemshilikter bar ekenin kórsetedi", — dedi Nazarbaev.
Prezident investitsiialar jáne damý ministri Jeńis Qasymbekten mán-jaidy surady.
"Ne boldy, barlyǵy ury bolyp shyqty ma túbinde?", — dedi prezident.
"Qazaqavtojol – respýblikalyq mańyzdaǵy avtojoldarǵa qyzmet kórsetetin respýblikalyq kásiporyn. Ol jol salýmen ainalyspaidy, biraq basshylyq jemqorlyq qylmysyna bailanysty qazir sot protsesinen ótip jatyr", — dep jaýap berdi ministr.
"Jumys oryndaǵanda biz normativke qaraimyz. Normativ baiaǵyda eskirip qalǵan, normativke emes, joldardyń sapasyna qaraý kerek. Normativpen salady, normativpen aqsha alady, bir kezderi balabaqshalardy da záýlim sarai qyp turǵyzǵany sekildi. Memlekette aqsha paida bola qalǵan kezde, báriniń arany ashyla qalady. Sonda ministrlik ne úshin qajet? Memlekettiń aqshasy qaida jumsalyp otyrǵanyn baqylaý úshin. Bul seniń jumysyńda kemshin tustar bar degen sóz", — dep synady Nazarbaev Qasymbekke.
Derekkóz: sputniknews.kz
