Nursultan Nazarbaev Qazaqstan halqy Assambleıasy Tóraǵasynyń orynbasary Janseıit Túımebaevty qabyldady dep habarlaıdy Dalanews.kz Elbasynyń saıtyna silteme jasap.
Kezdesý barysynda Elbasyna Qazaqstan halqy Assambleıasynyń jáne óńirlik Dostyq úıleriniń jumys josparynyń oryndalýy týraly aqparat usynyldy.
– 1995 jyly biz kópultty memleketimizdiń barlyq azamattarynyń quqyqtaryn qorǵaý úshin Qazaqstan halqy Assambleıasyn qurdyq. Keıin Assambleıa konstıtýsıalyq organǵa aınaldy. Táýelsizdiktiń alǵashqy kúnderinen bastap biz únemi elimizdegi barlyq etnos ókilderiniń teńdigin qamtamasyz ettik, - dedi Qazaqstannyń Tuńǵysh Prezıdenti.
Elbasy Qazaqstan halqy Assambleıasynyń apparaty mádenı jáne oıyn-saýyq is-sharalarǵa emes, eń aldymen saraptamalyq jumystarǵa basa mán berýi kerektigin atap ótti.
– Biz 30 jyldyń ishinde qazaqstandyqtardyń birligi men tutastyǵynyń arqasynda búgingi jetistikterge qol jetkizdik. Kópultty memleket bolýymyz – bizdiń artyqshylyǵymyz, - dedi Qazaqstan halqy Assambleıasynyń Tóraǵasy.
Nursultan Nazarbaev Qazaqstan halqy Assambleıasy apparaty men óńirlik ókildikteriniń qyzmetin jandandyrý úshin aýdıt ótkizýdi tapsyrdy.
Óz kezeginde, J.Túımebaev Assambleıanyń ǵylymı-saraptamalyq qyzmetin kúsheıtý jáne etnosaralyq qatynastar salasynda zertteýler júrgizý boıynsha qabyldanǵan sharalar týraly baıandady.
Kezdesý sońynda Qazaqstannyń Tuńǵysh Prezıdenti birqatar naqty tapsyrma berdi.
