– Meniń tapsyrmalarymnyń bári oblysta tolyq oryndalýda. Bul óńirdegi jumystardyń bastamasy jaqsy dep sanaımyn. Úsh jylda 3 mıllıon sharshy metrden astam turǵyn úı paıdalanýǵa berildi. Tek byltyrdyń ózinde 35 mektep salyndy, – dedi Elbasy.
Sonymen qatar Qazaqstan Prezıdenti «Bes áleýmettik bastamanyń» óńirdegi iske asyrylý barysyna oń baǵa berip, oblystyń týrısik áleýetin damytý qajettigi týraly aıtty.
– Jumys saparym barysynda Alakólge baryp, onyń týrısik klasterimen tanystym. Barsha qazaqstandyqtarǵa bizde tamasha demalys orny bar ekenin aıtqym keledi. Bul jer osyǵan deıin ıgerilmegen bolatyn. Onyń ınfraqurylymy da, qonaq úıleri de bolmaǵan edi.
Búginde bul óńirde bıznes ókilderi belsendi túrde jumys isteýde.
Kóldiń jaǵasynda álemdik standarttarǵa saı keletin bes juldyzdy qonaq úı salyndy, – dedi Elbasy.
Nursultan Nazarbaev óńirdegi ınfraqurylymdyq jobalardy iske asyrýdyń qazirgi nátıjeleri men aldaǵy josparlary jóninde áńgimeledi.
– Memleket keremet jaıly «Almaty – Taldyqorǵan» jolyn salyp berdi. Bul Alakól arqyly Shyǵys Qazaqstanǵa aparatyn ótpeli jol bolady. Jol salýdyń arqasynda kóp jumys orny ashylady, – dedi Memleket basshysy.
Sondaı-aq, Elbasy óńirdiń negizgi ekonomıkalyq kórsetkishteri oń qarqyn alyp otyrǵanyn atap ótip, oblystyń damý barysyna toqtaldy.
– Almaty oblysy, ásirese agrarlyq salada, bárine úlgi bolyp otyr.
Óńir ekonomıkasy 4,2 paıyzǵa ósti, bul elimizdegi ortasha kórsetkishten joǵary.
Aýyl sharýashylyǵy men qurylys salalary órkendep, iske qosylǵan áleýmettik nysandar kóbeıip keledi, – dedi Nursultan Nazarbaev.
Sonymen birge Qazaqstan Prezıdenti oblys basshylyǵy tarapynan erekshe nazar aýdarýdy qajet etetin mindetterge toqtaldy.
– Oblystyń búkil ekonomıkasy 3-4 aýdanda shoǵyrlanǵan. Onyń ózi tek ónerkásipti qamtıdy. Osy aýdandar óńir ekonomıkasynyń 70 paıyzyn qamtamasyz etip otyr. Basqa aýdandar baıaý damýda, osy máselege nazar aýdarý kerek, – dedi Elbasy.
Sonymen qatar Nursultan Nazarbaev osy óńirde mal sharýashylyǵy men aýyl sharýashylyǵy ónimderin qaıta óńdeý sektoryn damytý qajettigi jóninde aıtty.
Sýretter: akorda.kz saıtynan alyndy
