– مەنٸڭ تاپسىرمالارىمنىڭ بەرٸ وبلىستا تولىق ورىندالۋدا. بۇل ٶڭٸردەگٸ جۇمىستاردىڭ باستاماسى جاقسى دەپ سانايمىن. ٷش جىلدا 3 ميلليون شارشى مەتردەن استام تۇرعىن ٷي پايدالانۋعا بەرٸلدٸ. تەك بىلتىردىڭ ٶزٸندە 35 مەكتەپ سالىندى, – دەدٸ ەلباسى.
سونىمەن قاتار قازاقستان پرەزيدەنتٸ «بەس ەلەۋمەتتٸك باستامانىڭ» ٶڭٸردەگٸ ٸسكە اسىرىلۋ بارىسىنا وڭ باعا بەرٸپ, وبلىستىڭ تۋريستٸك ەلەۋەتٸن دامىتۋ قاجەتتٸگٸ تۋرالى ايتتى.
– جۇمىس ساپارىم بارىسىندا الاكٶلگە بارىپ, ونىڭ تۋريستٸك كلاستەرٸمەن تانىستىم. بارشا قازاقستاندىقتارعا بٸزدە تاماشا دەمالىس ورنى بار ەكەنٸن ايتقىم كەلەدٸ. بۇل جەر وسىعان دەيٸن يگەرٸلمەگەن بولاتىن. ونىڭ ينفراقۇرىلىمى دا, قوناق ٷيلەرٸ دە بولماعان ەدٸ.
بٷگٸندە بۇل ٶڭٸردە بيزنەس ٶكٸلدەرٸ بەلسەندٸ تٷردە جۇمىس ٸستەۋدە.
كٶلدٸڭ جاعاسىندا ەلەمدٸك ستاندارتتارعا ساي كەلەتٸن بەس جۇلدىزدى قوناق ٷي سالىندى, – دەدٸ ەلباسى.
نۇرسۇلتان نازارباەۆ ٶڭٸردەگٸ ينفراقۇرىلىمدىق جوبالاردى ٸسكە اسىرۋدىڭ قازٸرگٸ نەتيجەلەرٸ مەن الداعى جوسپارلارى جٶنٸندە ەڭگٸمەلەدٸ.
– مەملەكەت كەرەمەت جايلى «الماتى – تالدىقورعان» جولىن سالىپ بەردٸ. بۇل الاكٶل ارقىلى شىعىس قازاقستانعا اپاراتىن ٶتپەلٸ جول بولادى. جول سالۋدىڭ ارقاسىندا كٶپ جۇمىس ورنى اشىلادى, – دەدٸ مەملەكەت باسشىسى.
سونداي-اق, ەلباسى ٶڭٸردٸڭ نەگٸزگٸ ەكونوميكالىق كٶرسەتكٸشتەرٸ وڭ قارقىن الىپ وتىرعانىن اتاپ ٶتٸپ, وبلىستىڭ دامۋ بارىسىنا توقتالدى.
– الماتى وبلىسى, ەسٸرەسە اگرارلىق سالادا, بەرٸنە ٷلگٸ بولىپ وتىر.
ٶڭٸر ەكونوميكاسى 4,2 پايىزعا ٶستٸ, بۇل ەلٸمٸزدەگٸ ورتاشا كٶرسەتكٸشتەن جوعارى.
اۋىل شارۋاشىلىعى مەن قۇرىلىس سالالارى ٶركەندەپ, ٸسكە قوسىلعان ەلەۋمەتتٸك نىساندار كٶبەيٸپ كەلەدٸ, – دەدٸ نۇرسۇلتان نازارباەۆ.
سونىمەن بٸرگە قازاقستان پرەزيدەنتٸ وبلىس باسشىلىعى تاراپىنان ەرەكشە نازار اۋدارۋدى قاجەت ەتەتٸن مٸندەتتەرگە توقتالدى.
– وبلىستىڭ بٷكٸل ەكونوميكاسى 3-4 اۋداندا شوعىرلانعان. ونىڭ ٶزٸ تەك ٶنەركەسٸپتٸ قامتيدى. وسى اۋداندار ٶڭٸر ەكونوميكاسىنىڭ 70 پايىزىن قامتاماسىز ەتٸپ وتىر. باسقا اۋداندار باياۋ دامۋدا, وسى مەسەلەگە نازار اۋدارۋ كەرەك, – دەدٸ ەلباسى.
سونىمەن قاتار نۇرسۇلتان نازارباەۆ وسى ٶڭٸردە مال شارۋاشىلىعى مەن اۋىل شارۋاشىلىعى ٶنٸمدەرٸن قايتا ٶڭدەۋ سەكتورىن دامىتۋ قاجەتتٸگٸ جٶنٸندە ايتتى.
سۋرەتتەر: akorda.kz سايتىنان الىندى
