- Jaqsylyq adam úshin eshqashan kemshin qasiet bolyp tabylmaidy. Biraq eger jasalǵan jaqsylyq bizneske, memlekettiń damýyna kedergi keltiretin bolsa, ondaida onyń maǵynasy joiylady. Sondyqtan onyń ara-jigin ashyp alyp otyrý kerek.
Eger ol moinyna júktelgen mindetti atqara almasa, qolynan ol kelmese, urlyq jasasa, men oǵan jaqsylyq jasaýym kerek pe, basqa adamdar mundaida ne deidi?
Men, qatal boldym, tipti óz týystaryma da. Biz jas memleket boldyq, esh jerden tájiribe almaǵan, ne isteý kerektigin, qalai jasaý qajettigin bilmeitin. Sondyqtan bul arada qatelikterge jol berilýi múmkin. Adamǵa sengen, al sol sengen adamyn artynan tas atqannan jamany joq. Sondai jiirkenishti. Iaǵni, siz oǵan jaqsylyq jasaisyz, al ol sizge qastyqpen jaýap beredi. Biraq men keshiremin, taǵy da keshiremin. Umytamyn, ony esimnen shyǵarýǵa da tyrysamyn. Satqyn eshqashan tynysh ómir súre almaidy ǵoi. Óitkeni ony ishtei satqyndyq kemirip áketip barady. Árine, túbi jaqsy bolmaidy. Satqynda tek bir-aq jol bar, - dedi Elbasy.
Elbasy bir kezderi elden qashyp ketkenderdiń bárin keshirýge daiyn ekenin, "tek halqy aldynda óz kinásin ashyq moiyndap, urlaǵan aqshany qaitaryp, táýbege kelse bolǵany" dep aitqanyn eske aldy. Biraq, ázirge syrttan buǵan jaýap bergen eshkim bolmapty.
Bul rette qashqyn bankir Muhtar Ábliazov mysalǵa keltirildi.
- Ábliazov satqyn emes pe? Men ony jastai energetika ministri etip taǵaiyndadym, ol jumys istei bastady, sóitip urlyq jasady. Buǵan meniń ne qatysym bar? Men ony qoldadym, ósirdim. Urlyq jasaǵan eken, túrmege otyrǵyzdym. Birinen keiin birin hattardy burqyratty. "Ony keshirińizshi, bosatyńyzshy" dep dostary men týystary da jazdy.
Biraz ýaqyt ótken soń prezidenttiń keshirim berý quqyǵyn paidalana otyryp, ony keshirdim. Áitpese qazir ol áli túrmede otyrar edi, múmkin ústine taǵy qosyp alar ma edi?
Al sodan keiin ony bankke qaita jiberdim, al ol ne istedi? 7,5 milliard dollardy qoldy qyldy, qazir sol aqshaǵa, mine 15 jyl boldy, Batysta ómir súrip jatyr. Nesimen ómir súrip jatyr? Onyń jumysy joq qoi, jalaqy almaidy. Bul - depozitterge salynǵan halyqtyń aqshasy, memleket sol urlanǵan aqshany adamdarǵa qaitaryp berdi. Biz áli kúnge deiin bul aqshany izdep, talap etip, tam-tumdap qaitaryp alyp jatyrmyz. Sonda bul qalai bolǵany? Sony esime túsirgim kelmep edi, tek ol da solardyń bireýi (satqyndardyń), - dep naqtylady sózin Tuńǵysh Prezident.
Onyń pikirinshe, adamǵa, eń aldymen týǵan eli men jeri jaqyn bolýy kerek.
- Keide otyryp oilanamyn, osynyń barlyǵy oǵan ne úshin kerek dep? Ásirese, qazaq úshin shetelde ómir súrý ońai emes. Qazaqtar: "Ózge elde sultan bolǵansha, óz elinde ultan bol" dep beker aitpaǵan. Ondaǵy qymbat meiramhanaǵa 10 ret bardyńyz, 10 jańa kostiým satyp alyp, kidińiz, gambýrgerdi qalaǵanyńyzsha jedińiz delik, biraq qashanǵa deiin? Ainaladaǵylardyń barlyǵy jat, jaqynnan eshteńe joq. Óz týǵan elin, jerin bárinen de eń jaqyny. Árine, basqa túskeni sol, ońai emes. Solai boldy. Ókinishti, árine. Jalpy alǵanda, ol adam jaqsy jumys istep, óz Otanyna járdem bere alar edi, al biraq ol qashqyn bolyp shyqty. Meniń jaqsylyǵymdy, qoldaýymdy kórgen, biraq qazir jyraqta óz eline qarsy jumys istep jatqan sol sekildi birneshe adam bar. Biz bárimiz táýelsizdigimizdi jabyla, jumyla qorǵaýymyz kerek, - dep sózin qorytyndylady Nazarbaev.
