"Partıalastar, ákimder, osy jerde otyrǵan barlyǵyńyzǵa aıtarym — baǵdarlama durys júzege asyrylýy kerek, urlaý degen bolmasyn. Kimge aqsha bólinse, soǵan jetýi kerek", — dedi Nazarbaev "Nur Otan" partıasy saıası keńesiniń keńeıtilgen otyrysynda.
Prezıdenttiń aıtýynsha, bul baǵdarlamany júzege asyrý qurylys qarqynyn arttyrady, nátıjesinde bıznes damıdy.
"Qurylysqa materıaldar kerek. Munyń bárin bıznes jasaıdy. Amerıkany Ford myrza bastaǵan avtomobıl ónerkásibi kótergeni únemi aıtylyp júredi. Bizdiń eldi turǵyn úı qurylysy men aýyl sharýashylyǵy damyta alady", — dedi Nazarbaev.
Aıta ketsek, "7 — 20 — 25" turǵyn úı baǵdarlamasy boıynsha jumys isteıtin árbir qazaqstandyq tómendegideı sharttar boıynsha teńgemen ıpoteka alý múmkindigine ıe bolady. Nesıe ósiminiń mólsherlemesi jylyna 7 paıyzdan aspaıdy. Bastapqy jarna baspana qunynyń 20 paıyzy mólsherinde belgilenedi. Nesıe alýshynyń aı saıynǵy tólemin azaıtý úshin onyń merzimi 10-15 emes, 25 jylǵa deıin bolady.
Bankterden kredıtterdi satyp alatyn operator qurylyp, ol "Baspana" ıpotekalyq kompanıasy dep atalmaq. Baǵdarlama 2018 jyldyń ekinshi jartysynan bastap iske qosylady dep josparlanyp otyr.
Derekkóz: sputniknews.kz
