"پارتيالاستار، اكىمدەر، وسى جەردە وتىرعان بارلىعىڭىزعا ايتارىم — باعدارلاما دۇرىس جۇزەگە اسىرىلۋى كەرەك، ۇرلاۋ دەگەن بولماسىن. كىمگە اقشا بولىنسە، سوعان جەتۋى كەرەك"، — دەدى نازاربايەۆ "نۇر وتان" پارتياسى ساياسي كەڭەسىنىڭ كەڭەيتىلگەن وتىرىسىندا.
پرەزيدەنتتىڭ ايتۋىنشا، بۇل باعدارلامانى جۇزەگە اسىرۋ قۇرىلىس قارقىنىن ارتتىرادى، ناتيجەسىندە بيزنەس داميدى.
"قۇرىلىسقا ماتەريالدار كەرەك. مۇنىڭ ءبارىن بيزنەس جاسايدى. امەريكانى فورد مىرزا باستاعان اۆتوموبيل ونەركاسىبى كوتەرگەنى ۇنەمى ايتىلىپ جۇرەدى. ءبىزدىڭ ەلدى تۇرعىن ءۇي قۇرىلىسى مەن اۋىل شارۋاشىلىعى دامىتا الادى"، — دەدى نازاربايەۆ.
ايتا كەتسەك، "7 — 20 — 25" تۇرعىن ءۇي باعدارلاماسى بويىنشا جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن يپوتەكا الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى جىلىنا 7 پايىزدان اسپايدى. باستاپقى جارنا باسپانا قۇنىنىڭ 20 پايىزى مولشەرىندە بەلگىلەنەدى. نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس، 25 جىلعا دەيىن بولادى.
بانكتەردەن كرەديتتەردى ساتىپ الاتىن وپەراتور قۇرىلىپ، ول "باسپانا" يپوتەكالىق كومپانياسى دەپ اتالماق. باعدارلاما 2018 جىلدىڭ ەكىنشى جارتىسىنان باستاپ ىسكە قوسىلادى دەپ جوسپارلانىپ وتىر.
دەرەككوز: sputniknews.kz
