Qostanaida aýrýhana patsientterin tamaqtandyrý qyzmetine qatysty memlekettik satyp alý konkýrsynyń nátijeleri kassatsiialyq sot sheshimimen joiyldy. Buǵan jeńimpaz kompaniianyń biliktilik talaptaryna sáikestigine qatysty daý sebep bolǵan, dep habarlaidy dalanews.kz.
Daý Qostanai oblysy ákimdiginiń memlekettik satyp alý basqarmasy men «L.» JShS arasynda týyndaǵan.
Memlekettik satyp alýdyń tapsyrys berýshisi Qostanai qalalyq aýrýhanasy bolǵan. Bastapqyda konkýrs jeńimpazy retinde «S.» óndiristik kooperativi tanylǵan. Alaida qatysýshylardyń shaǵymdarynan keiin onyń ótinimi qabyldanbaǵan. 2025 jylǵy 28 qarashada jeńimpaz bolyp «S.» JShS tanylyp, «L.» JShS ekinshi oryn alǵan.
«L.» JShS jeńimpaz kompaniia konkýrs qujattamasynda talap etilgen dietalyq meiirgerdiń bar ekenin rastaityn qujattardy usynbaǵan dep eseptep, sotqa júgingen.
Birinshi satydaǵy sot talap aryzdy qanaǵattandyryp, konkýrs qorytyndylary týraly hattamany zańsyz, al memlekettik satyp alý shartyn jaramsyz dep tanyǵan. Alaida apelliatsiialyq sot bul sheshimniń kúshin joiyp, talap aryzdy qanaǵattandyrýdan bas tartqan.
Kassatsiialyq sot apelliatsiialyq instantsiianyń tujyrymdarymen kelispedi. Sottyń málimetinshe, «S.» JShS usynǵan kýálik konkýrs qujattamasynda belgilengen biliktilik talaptaryna sáikestikti rastaýǵa jetkiliksiz bolǵan. Sondyqtan kompaniianyń ótinimi qabyldanbaýǵa tiis edi.
Sot apelliatsiialyq instantsiianyń dietologiia salasyndaǵy meiirgerlik is mamandyǵynyń sertifikattaýǵa jatatyn mamandyqtar tiziminde bolmaýyna qatysty ýájin de negizsiz dep tanydy. Sebebi bul jaǵdaida másele maman sertifikatynyń bolýynda emes, konkýrs qujattamasynda kórsetilgen biliktilik talaptarynyń oryndalýynda bolǵan.
Osylaisha, kassatsiialyq sot apelliatsiialyq sot qaýlysynyń kúshin joiyp, birinshi satydaǵy sot sheshimin kúshinde qaldyrdy. «L.» JShS-niń kassatsiialyq shaǵymy qanaǵattandyryldy.
