Advokat Saida Táýkeleva erteń Úkimette orfandyq (sirek kezdesetin) aýrýlarǵa shaldyqqan naýqastardy dári-dármekpen qamtamasyz etý máselesine arnalǵan mańyzdy jiyn ótetinin habarlady. Onyń aitýynsha, jiynǵa «Qazaqstan halqyna» qorynyń ókilderi de qatysady, dep habarlaidy Dalanews.kz.
«Qazir taǵy da jeti óńirdiń naýqastaryn qamtamasyz etýge daiynbyz degen málimdemeler aitylyp jatyr. Biraq ol ýádelerdiń artynda naqty quqyqtyq nemese qarjylyq kepildik joq. Akimattardan joldanǵan hattar – bul jai ǵana hattar. Olar qymbat dárilerdi turaqty satyp alý máselesin sheshpeidi, júielik problemany túbegeili joia almaidy», – dedi Táýkeleva.
Onyń aitýynsha, bul – tek statistika ne áleýmettik jobalar emes, naqty adamdardyń – balalar men eresekterdiń ómiri týraly másele.
«Qazaqstan halqyna» qorynyń mindeti qandai?
Saida Táýkeleva qordyń basty maqsaty – dál osyndai eń osal toptarǵa kómek kórsetý ekenin eske saldy.
«Bul – qordyń jarǵylyq qyzmeti. Basty basymdyq – bilim berý jobalary nemese qosalqy bastamalar emes, orfandyq aýrýǵa shaldyqqandardy qymbat dári-dármekpen qamtamasyz etý. Bul – ómir men ólim máselesi. "Qyzyq" baǵyttardy tańdaýǵa bolatyn optsiia emes», – dedi ol.
Memleket pen Qordyń jaýapkershiligi
Advokattyń aitýynsha, memleket mundai naýqastardy dárimen qamtýǵa tikelei jaýapty. Alaida dál osy mindetti oryndaýǵa Úkimettiń keide qaýqary jetpegen jaǵdaida, «Qazaqstan halqyna» qory – qoldaý quraly retinde qurylǵan. Sondyqtan qor shuǵyl áreket etýi tiis, deidi ol.
«Búginde basymdyqtar naqty qoiylýy kerek. Eń bastysy – naýqastarǵa dári jetkizý. Qalǵan jobalar keiin turýy tiis. Basta!» – dep túiindedi Táýkeleva.
Ol qazirgi ýaqytta orfandyq naýqastar dári-dármeksiz qalyp otyrǵanyn aityp, bul máseleni erteń úkimet aldynda ashyq kóteretinin jetkizdi.
