NATO: Pýtin Ýkrainaǵa jasaǵan agressiiasy úshin jaýap beredi
Resei bolsa batystyń áskeri aliansyna "qyzyl syzyqtan" ótpeýge keńes berdi.
Batystyń Reseige baǵyttalǵan eskertýi 30 qarashada Rigada NATO elderi syrtqy ister ministrleriniń kezdesýinde aityldy. Ministrler Resei jaqtan kelýi múmkin qaýipti talqyǵan.
Ýkrainanyń málimdeýinshe, Máskeý jyl basynda Reseidiń batysyndaǵy oqý aiaqtalǵan soń ondaǵan myń áskeri men aýyr tehnikasyn Ýkrainamen shekaraǵa jaqyn mańǵa ornalastyrdy. Kiev kórshi el shabýylynan seskenedi.
2014 jyly Qyrymdy anneksiialap alǵan Resei Ýkrainanyń shyǵysynda Kievke qarsy soǵysyp júrgen jikshilderdi qoldap otyr. Kreml Ýkrainaǵa shabýyl jasaýy múmkin degendi joqqa shyǵaryp, Kiev pen onyń batystaǵy jaqtastaryn jaǵdaidy ádeii shielenistirdi dep aiyptady.
NATO-nyń áskeri infraqurylymynyń Ýkrainada keńeiýi Resei úshin dál osy "qyzyl syzyqqa" ainalýy múmkin, odan soń Máskeý mundai qaýipten qorǵaný úshin dál osylai áreket etýge májbúr bolady, dep málimdedi Resei prezidenti Vladimir Pýtin 30 qarashada "Resei shaqyrady!" forýmynda.
NATO-nyń bas hatshysy Iens Stoltenberg "Resei Ýkrainaǵa taǵy da kúsh kórsetse, sol áreketi úshin jaýap beredi" dep málimdep, Batys Máskeýge sanktsiia salǵanyn eske saldy. "Shabýyldaýy múmkin be degen máseleni uzaq talqylaýǵa bolady. Biz bárine daiyn bolýymyz kerek", — dedi Stoltenberg.
