رەسەيدىڭ اسكەري كۇشتەرى ۋكراينا شەكاراسىنا جاقىن ماڭعا شوعىرلانىپ جاتقان ۋاقىتتا ناتو ماسكەۋگە كورشى ەلگە جاسالۋى مۇمكىن جاڭا اسكەري اگرەسسياسى ءۇشىن جاۋاپ بەرەتىنىن ەسكەرتتى.

رەسەي بولسا باتىستىڭ اسكەري اليانسىنا "قىزىل سىزىقتان" وتپەۋگە كەڭەس بەردى.

باتىستىڭ رەسەيگە باعىتتالعان ەسكەرتۋى 30 قاراشادا ريگادا ناتو ەلدەرى سىرتقى ىستەر مينيسترلەرىنىڭ كەزدەسۋىندە ايتىلدى. مينيسترلەر رەسەي جاقتان كەلۋى مۇمكىن ءقاۋىپتى تالقىعان.

ۋكراينانىڭ مالىمدەۋىنشە، ماسكەۋ جىل باسىندا رەسەيدىڭ باتىسىنداعى وقۋ اياقتالعان سوڭ ونداعان مىڭ اسكەرى مەن اۋىر تەحنيكاسىن ۋكراينامەن شەكاراعا جاقىن ماڭعا ورنالاستىردى. كييەۆ كورشى ەل شابۋىلىنان سەسكەنەدى.

2014 جىلى قىرىمدى اننەكسيالاپ العان رەسەي ۋكراينانىڭ شىعىسىندا كييەۆكە قارسى سوعىسىپ جۇرگەن جىكشىلدەردى قولداپ وتىر. كرەمل ۋكرايناعا شابۋىل جاساۋى مۇمكىن دەگەندى جوققا شىعارىپ، كييەۆ پەن ونىڭ باتىستاعى جاقتاستارىن جاعدايدى ادەيى شيەلەنىستىردى دەپ ايىپتادى.

ناتو-نىڭ اسكەري ينفراقۇرىلىمىنىڭ ۋكراينادا كەڭەيۋى رەسەي ءۇشىن ءدال وسى "قىزىل سىزىققا" اينالۋى مۇمكىن، ودان سوڭ ماسكەۋ مۇنداي قاۋىپتەن قورعانۋ ءۇشىن ءدال وسىلاي ارەكەت ەتۋگە ءماجبۇر بولادى، دەپ مالىمدەدى رەسەي پرەزيدەنتى ۆلاديمير پۋتين 30 قاراشادا "رەسەي شاقىرادى!" فورۋمىندا.

ناتو-نىڭ باس حاتشىسى يەنس ستولتەنبەرگ "رەسەي ۋكرايناعا تاعى دا كۇش كورسەتسە، سول ارەكەتى ءۇشىن جاۋاپ بەرەدى" دەپ مالىمدەپ، باتىس ماسكەۋگە سانكسيا سالعانىن ەسكە سالدى. "شابۋىلداۋى مۇمكىن بە دەگەن ماسەلەنى ۇزاق تالقىلاۋعا بولادى. ءبىز بارىنە دايىن بولۋىمىز كەرەك"، — دەدى ستولتەنبەرگ.