Qazaqstanda qosymsha qun salyǵy 2026 jyldan bastap 12%-dan 16%-ǵa ósedi. Alaida bul elde daǵdarysqa alyp kelmeidi. Bul týraly Ulttyq ekonomika vitse-ministri Azamat Ámrin málimdedi, dep habarlaidy Dalanews.kz.
Ámrinniń aitýynsha, QQS ósimi infliatsiiaǵa qosymsha 2–2,5% yqpal etýi múmkin. Biraq ol jappai qymbatshylyq bolmaitynyn atap ótti.
"Kóptegen taýarlar qosymsha qun salyǵynan bosatylǵan. Máselen, azyq-túliktiń negizgi túrlerin óndiretin aýyl sharýashylyǵy taýar óndirýshileri men sharýa qojalyqtary bul salyqty tólemeidi. Sondyqtan baǵanyń qosymsha qun salyǵy esebinen kóterilýine quqyqtyq ta, ekonomikalyq ta negiz joq", – dedi vitse-ministr.
Onyń sózinshe, aýyl sharýashylyǵy óndirýshileriniń qosymsha qun salyǵyn tóleý nemese tólemeý quqyǵy saqtalǵan.
"Eger fermerdiń ózi qosymsha qun salyǵyn tóleýshi bolýdy qalasa, ol bul mártebeni tańdai alady. Bul olarǵa basqa qosymsha qun salyǵyn tóleýshilermen jumys isteýge múmkindik beredi", – dedi Ámrin.
Vitse-ministrdiń aitýynsha, Salyq kodeksin talqylaý kezinde ministrlik ókilderi aimaqtarǵa baryp, aýyl sharýashylyǵy óndirýshilerimen kezdesken. Sol kezde sharýalardyń ózderi "tóleýshi" bolý quqyǵyn saqtap qalýdy suraǵan.
"Biz bastapqyda agrarlyq sektordy múlde qosymsha qun salyǵyn tóleýshiler qatarynan shyǵaryp tastaýdy usyndyq. Biraq biznes, kerisinshe, bizge bul quqyqty qaldyryńdar dedi. Biz sol múmkindikti saqtap qaldyq", – dep túsindirdi ol.
Jańa Salyq kodeksi boiynsha qosymsha qun salyǵynyń mólsherlemesi 12%-dan 16%-ǵa kóterilmek. Ol 2026 jyldyń 1 qańtarynan bastap kúshine enedi.
