قازاقستاندا قوسىمشا قۇن سالىعى 2026 جىلدان باستاپ 12%-دان 16%-عا ٶسەدٸ. الايدا بۇل ەلدە داعدارىسقا الىپ كەلمەيدٸ. بۇل تۋرالى ۇلتتىق ەكونوميكا ۆيتسە-مينيسترٸ ازامات ەمرين مەلٸمدەدٸ, دەپ حابارلايدى Dalanews.kz.
ەمريننٸڭ ايتۋىنشا, ققس ٶسٸمٸ ينفلياتسيياعا قوسىمشا 2–2,5% ىقپال ەتۋٸ مٷمكٸن. بٸراق ول جاپپاي قىمباتشىلىق بولمايتىنىن اتاپ ٶتتٸ.
"كٶپتەگەن تاۋارلار قوسىمشا قۇن سالىعىنان بوساتىلعان. مەسەلەن, ازىق-تٷلٸكتٸڭ نەگٸزگٸ تٷرلەرٸن ٶندٸرەتٸن اۋىل شارۋاشىلىعى تاۋار ٶندٸرۋشٸلەرٸ مەن شارۋا قوجالىقتارى بۇل سالىقتى تٶلەمەيدٸ. سوندىقتان باعانىڭ قوسىمشا قۇن سالىعى ەسەبٸنەن كٶتەرٸلۋٸنە قۇقىقتىق تا, ەكونوميكالىق تا نەگٸز جوق", – دەدٸ ۆيتسە-مينيستر.
ونىڭ سٶزٸنشە, اۋىل شارۋاشىلىعى ٶندٸرۋشٸلەرٸنٸڭ قوسىمشا قۇن سالىعىن تٶلەۋ نەمەسە تٶلەمەۋ قۇقىعى ساقتالعان.
"ەگەر فەرمەردٸڭ ٶزٸ قوسىمشا قۇن سالىعىن تٶلەۋشٸ بولۋدى قالاسا, ول بۇل مەرتەبەنٸ تاڭداي الادى. بۇل ولارعا باسقا قوسىمشا قۇن سالىعىن تٶلەۋشٸلەرمەن جۇمىس ٸستەۋگە مٷمكٸندٸك بەرەدٸ", – دەدٸ ەمرين.
ۆيتسە-مينيستردٸڭ ايتۋىنشا, سالىق كودەكسٸن تالقىلاۋ كەزٸندە مينيسترلٸك ٶكٸلدەرٸ ايماقتارعا بارىپ, اۋىل شارۋاشىلىعى ٶندٸرۋشٸلەرٸمەن كەزدەسكەن. سول كەزدە شارۋالاردىڭ ٶزدەرٸ "تٶلەۋشٸ" بولۋ قۇقىعىن ساقتاپ قالۋدى سۇراعان.
"بٸز باستاپقىدا اگرارلىق سەكتوردى مٷلدە قوسىمشا قۇن سالىعىن تٶلەۋشٸلەر قاتارىنان شىعارىپ تاستاۋدى ۇسىندىق. بٸراق بيزنەس, كەرٸسٸنشە, بٸزگە بۇل قۇقىقتى قالدىرىڭدار دەدٸ. بٸز سول مٷمكٸندٸكتٸ ساقتاپ قالدىق", – دەپ تٷسٸندٸردٸ ول.
جاڭا سالىق كودەكسٸ بويىنشا قوسىمشا قۇن سالىعىنىڭ مٶلشەرلەمەسٸ 12%-دان 16%-عا كٶتەرٸلمەك. ول 2026 جىلدىڭ 1 قاڭتارىنان باستاپ كٷشٸنە ەنەدٸ.
