Densaýlyq saqtaý ministrligi BJZQ qarajatyn tis emdeýge jumsaýǵa tyiym salýdy usyndy. Mundai buiryq jobasy "Ashyq NQA" portalynda jariialandy,- dep habarlaidy Dalanews.kz.
Ministrlik málimetine súiensek, bul bastama zańsyz áreketterge bailanysty usynylǵan.
"Zeinetaqy jinaǵyn maqsatsyz paidalaný derekteri anyqtalýyna bailanysty buiryq jobasynda stomatologiialyq qyzmetterge (tisterdi protezdeý, implantatsiialaý) bir rettik zeinetaqy tólemin paidalaný jónindegi normany alyp tastaý kózdeledi", – dep jazylǵan buiryq jobasy mátininde.
Buiryq jobasyn jariia talqylaý 30 qyrkúiekke deiin jalǵasady.
Bul daý qaidan bastaldy?
Buǵan deiin "Otbasy bank" tis emdeýge ótinish berý kezinde BZJQ qarajatyn maqsatsyz paidalaný jáne qujattardy qoldan jasaý derekteri anyqtalǵanyn málimdedi. Osylaisha 15 qyrkúiekten bastap 2026 jylǵy 15 sáýirge deiin enpf-otbasy.kz platformasynda tis emdeýge ótinish qabyldaý ýaqytsha toqtatyldy. Bank ókilderi "bul ýaqytqa deiin tiimdi tetik ázirlenedi" dep sendirdi.
Al keshe Atyraý oblysynda "Biryńǵai jinaqtaýshy zeinetaqy qorynan" qarajatty zańsyz alýǵa járdem kórsetken 5 qylmystyq toptyń áreketi áshkerelengeni belgili boldy.
BJZQ-dan qansha qarjy tis emdeýge jumsalǵan?
2021 jyldan 2025 jylǵy 20 tamyzǵa deiin Otbasy bankiniń enpf-otbasy.kz platformasy arqyly tek "Stomatologiialyq qyzmetter" baǵyty boiynsha 757 mlrd teńgege 795 424 tranzaktsiia jasalǵan.
Sonyń 222,61 mlrd teńgesi TOP-20 stomatologiialyq klinikaǵa túsken. Bul klinikalardyń jartysy Atyraýda, qalǵandary Almaty men Astanada ornalasqan.
